Увс аймгийн Засаг даргын орлогч С.Анхбаяр болон дуучин Б.Амархүү нарын хооронд үүссэн маргаан нийгмийн анхаарлын төвд хэвээр байна. Уран бүтээлчийг доромжилж, хүний эрх зөрчсөн гэх үндэслэлээр ХЭҮК-оос дүгнэлт гарсан ч тэрбээр ажлаа хэвийн үргэлжлүүлж байгаа юм.
МУСТА, ОХУ-ын Буриад улсын гавьяат жүжигчин Б.Амархүү 21 аймгаар хийж буй аялан тоглолтынхоо хүрээнд Увс аймгийн “Ойрад” театрт саатсан юм. Гэвч тоглолтын бэлтгэл ажлын үеэр театрын гэрэл, техникийн ажилтнууд байрандаа байгаагүй төдийгүй ёс зүйгүй хандсан талаар дуучин өөрийн цахим хуудсаараа дамжуулан гомдол мэдүүлсэн билээ.
Энэхүү шүүмжлэлийн хариуд аймгийн Засаг даргын орлогч С.Анхбаяр өөрийн байр сууриа илэрхийлэхдээ нэлээд хатуу бөгөөд ёс зүйгүй үг хэллэг ашигласан нь олны дургүйцлийг төрүүлсэн. Тэрбээр цахим хуудаснаа:
“Хар тамхичныг үзээгүй нь зөв шүү дээ. Бүр яагаад цаг гаргаж өгдөг юм. Зарим зүйлийг жигшиж байх хэрэгтэй шүү. Хар тамхичинд цаг гаргаж өгсөн театрын удирдлагуудад хариуцлага тооцуулна”
хэмээн бичсэн нь хүнийг гадуурхсан, нэр төр бүдүүлгээр халдсан үйлдэл болсон гэж иргэд үзэж байна.
Засаг даргын тайлбар ба хариуцлагын асуудал
Уг асуудал гарсны дараа С.Анхбаярыг гадаадад аялж, казино тоглож яваа гэх мэдээлэл цацагдаж эхэлсэн. Үүнд Увс аймгийн Засаг дарга Э.Насанбат албан ёсоор хариулт өгөхдөө, орлогч даргаа БНХАУ-д ажлын томилолтоор явааг тодотгосон юм. Тэрбээр С.Анхбаярыг ажлаас нь чөлөөлсөн гэх яриаг үгүйсгэж, томилолтоос ирснийх нь дараа сонсгол явуулж, хариуцлагын асуудлыг албан ёсоор хэлэлцэнэ гэдгээ мэдэгдэж байв.
Хүний эрхийн дүгнэлт ба өнөөгийн нөхцөл байдал
Хүний эрхийн Үндэсний Комиссоос (ХЭҮК) С.Анхбаярын гаргасан үйлдлийг хянан үзээд, хүний эрхийг ноцтой зөрчсөн гэсэн дүгнэлтэд хүрсэн. Гэсэн хэдий ч орон нутгийн удирдлагын зүгээс түүнд одоогоор ямар нэгэн сахилгын шийтгэл ногдуулаагүй байна.
Одоогийн байдлаар С.Анхбаяр нь Наранбулаг сумын нутаг дэвсгэрт өрнөж буй хатуу хучилттай авто замын бүтээн байгуулалтын ажилтай биечлэн танилцаж, албан үүргээ гүйцэтгэж яваа аж. Иргэдийн зүгээс төрийн албан хаагчийн ёс зүй болон хүний эрхийн асуудалд холбогдох байгууллагууд хэрхэн хандахыг анхааралтай ажиглаж байна.
