Баянзүрх дүүргийн 35 дугаар хороонд баавгайн халдлагад өртөж, хүнд гэмтсэн 55 настай эмэгтэйн биеийн байдал тогтворжсон талаар Гэмтэл согог судлалын үндэсний төвөөс мэдээлжээ.
Уг хэрэг аравдугаар сарын 7-ноос 8-нд шилжих шөнийн 01:00 цагийн орчимд суурин газраас алслагдсан айлын гэрт болсон. Халдлагын улмаас 40 настай эрэгтэй амиа алдаж, 55 настай эмэгтэй хүнд гэмтсэн байна.
Хоёр үе шаттай мэс заслын эмчилгээ хийжээ
Гэмтсэн иргэнийг аравдугаар сарын 8-ны шөнө ГССҮТ-ийн Салбар эмнэлгийн Эрчимт эмчилгээний тасагт хүргэж, шаардлагатай тусламж үзүүлсэн байна. Эхний ээлжид толгойн арьсны том хэмжээний хуулагдсан шарханд анхны цэгцэлгээ хийж, биеийн байдлыг нь тогтворжуулжээ.
Үүний дараа нарийн мэргэжлийн оношилгоо, шинжилгээ хийж, Төв эмнэлгийн Толгойн мэс заслын тасагт шилжүүлсэн байна. Тухайн өдрийн 14:00 цагийн орчимд мэс засал хийж:
- Гавлын ясны цөмөрсөн хугарлыг авсан
- Тархины даралтыг чөлөөлсөн
- Толгойн арьсны том хэмжээний шарханд хоёрдогч цэгцэлгээ хийсэн байна.
Эмчилгээг үргэлжлүүлж байна
Одоогоор өвчтөн ГССҮТ-ийн Эрчимт эмчилгээний тасагт эмчлүүлж байгаа бөгөөд биеийн байдал тогтворжжээ.
Албаны эх сурвалж “Өвчтөний биеийн байдал тогтворжсон. Эмнэлгийн тусламж үйлчилгээг үргэлжлүүлэн үзүүлж, биеийн байдлыг улам сайжруулахын төлөө анхаарч ажиллаж байна” гэж мэдээлсэн байна.
