УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох эрүүгийн хэргийг давж заалдах шатны шүүх хэлэлцэж, тэднийг суллах шийдвэр гаргажээ. Шүүхийн тогтоолын дагуу ШШГЕГ-ын харьяа Хорих 461 дүгээр ангид хоригдож байсан дээрх улс төрчдийг 2026.06.30-ны орой сулласан байна.
Хорих ялыг мөнгөн торгуулиар орлуулав
Нийслэлийн Эрүүгийн хэргийн Давж заалдах шатны шүүхээс анхан шатны шүүхийн шийдвэрийг өөрчилж, тэдний хоёр жилийн хорих ялыг хүчингүй болгожээ. Үүний оронд шүүгдэгч тус бүрийг 40 мянган нэгжтэй тэнцэх хэмжээний буюу 40 сая төгрөгөөр торгох ял оноохоор шийдвэрлэсэн байна. Харин нийтийн албанд томилогдох эрхийг таван жилийн хугацаагаар хасах хязгаарлалтыг хэвээр үлдээв.
Цагдан хоригдсон хоногийг хасаж тооцсон нь
Шүүх бүрэлдэхүүн тэдний урьдчилан хоригдсон хугацааг тооцож, оноосон торгох ялын дүнгээс тодорхой хэмжээний мөнгийг хасахаар тогтсон байна. Ингэхдээ цагдан хоригдсон нэг хоногийг 15 мянган төгрөгөөр дүйцүүлэн боджээ. Торгуулиас хасагдах хоногуудын нарийвчилсан тооцоог үзүүлбэл:
- Б.Энх-Амгалангийн хувьд 243 хоног хоригдсон тул 3.6 сая төгрөгийг торгох ялаас нь хасахаар болов.
- З.Энхболдын хувьд 74 хоног цагдан хоригдсон хугацааг нь мөн ажил дүйцүүлэн хасаж тооцжээ.
Энэхүү дуулиант хэргийн эргэн тойронд улс төрчдийн байр суурь ч анхаарал татаж байсан юм. Тухайлбал, УИХ-ын гишүүн асан О.Баасанхүү анхан шатны шүүхийн шийдвэрийн дараа байр сууриа илэрхийлэхдээ “Ерөнхийлөгч асан Х.Баттулга дахин сонгогдох боломжийг нь хаасан гээд өөрийнхөө шүүхээр З.Энхболд даргад ял өгүүллээ” хэмээн мэдэгдэж байжээ.
