The MongolZ баг маргааш IEM Kraków 2026 тэмцээний эхний тоглолтоо хийнэ

Польш улсын Краков хотноо зохион байгуулагдаж буй Intel Extreme Masters Kraków 2026 тэмцээн 1 дүгээр сарын 28-нд эхэлсэн билээ. Монголын The MongolZ баг дэлхийн чансааны ТОП-8-д багтсан амжилтаараа тэмцээний эхний шатыг алгасаж, маргааш буюу 1 дүгээр сарын 31-нд үндсэн хэсгийн (Stage 2) тоглолтоо эхлүүлэх гэж байна.

Одоогоор манай багийн эхний өрсөлдөгч хэн байх нь хараахан тодорхой болоогүй байна. Энэ нь өнөөдөр болох нэгдүгээр шатны (Stage 1) сүүлийн шийдвэрлэх тоглолтуудын дараа тодорхой болох бөгөөд шалгарч үлдсэн багуудын нэг нь The MongolZ-той нүүр тулах юм. Манай баг “Групп А”-д хуваарилагдсан бөгөөд эхний тоглолтоо “Best of 3” форматаар хийнэ.

IEM Kraków 2026 тэмцээний тухай ерөнхий мэдээлэл:

• Зохион байгуулагч: ESL.
• Хугацаа: 2026 оны 1 дүгээр сарын 28-наас 2 дугаар сарын 8-ны хооронд.
• Байршил: Польш, Краков хот, “TAURON Arena” (Плей-оффын шат).
• Шагналын сан: Нийт 1,250,000 ам.доллар.
• Формат: Нийт 24 баг оролцож байна. Тэмцээн гурван үе шаттайгаар явагдах бөгөөд ялагч баг “ESL Grand Slam”-ын оноо болон “EPT Winter Championship” цомыг хүртэнэ.

Монголын баг дэлхийн шилдэгүүдтэй өрсөлдөхөд бэлэн байгаа бөгөөд фенүүд нь маргаашийн тоглолтыг тэсэн ядан хүлээж байна. The MongolZ баг нь 1xBet-ийн дэмжлэгтэйгээр олон улсын тавцанд ийнхүү өрсөлдөж байгаа юм.