БНСУ-ын Чежү аралд визгүй зорчиж ирсэн нэгэн монгол иргэн тус арлаас зөвшөөрөлгүй гарахыг оролдож яваад илэрсэн байна.
Mongolnews24.com мэдээлснээр, энэ хэрэг есдүгээр сарын 18-нд Чежү боомт дээр болсон бөгөөд “А” овогтой монгол залуу зорчигч тээврийн хөлөг онгоцонд нууцаар суухыг завджээ. Тэрээр Мокпо хот руу явах гатлага онгоцонд суухын тулд нэгэн машины тээшинд нуугдаж байсан нь шалгалтын үеэр илэрсэн байна. Өмнөд Солонгосын хуулиар ийм төрлийн зөрчил гаргасан гадаадын иргэнд:
- гурван жил хүртэл хугацаагаар хорих ял эсвэл
- 20 сая воны торгууль оногдуулах зохицуулалттай.
Сануулахад, Монгол Улсын иргэд БНСУ-ын Чежү аралд 30 хоног хүртэл хугацаагаар визгүй зорчих эрхтэй. Гэвч Чежүгийн олон улсын чөлөөт хотын тухай тусгай хуулийн дагуу визгүй нэвтэрсэн жуулчид оршин суух хугацааг сунгах эрхгүй бөгөөд бусад муж, хот руу зорчихыг хатуу хориглодог.
