Хятад улс цоохор ирвэсийг хамгаалах ажлыг шат дараатай хэрэгжүүлсний үр дүнд тус улсын нутаг дахь энэ ховор амьтны тоо толгой 2013 оноос хойш хоёр дахин нэмэгдсэн байна.
“TV BRICS”-ийн мэдээлснээр Хятад улс цоохор ирвэсийн гол амьдрах бүс нутгуудад тусгай хамгаалалттай газрын сүлжээг өргөжүүлж, үндэсний хоёр цэцэрлэгт хүрээлэн болон бусад 78 тусгай хамгаалалттай газрыг байгуулжээ.
2013 онд Хятадад ойролцоогоор 2500 цоохор ирвэс байсан бол хамгаалалтын арга хэмжээний үр дүнд энэ тоо 5000 орчимд хүрсэн байна. Үүний зэрэгцээ тус амьтны тархац нутаг 2.08 сая орчим хавтгай дөрвөлжин километр болж тэлжээ.
Дэлхийн тархац нутгийн 60 гаруй хувь Хятадад ногддог
Хятадын Үндэсний ой, бэлчээрийн газрын мэдээллийг эш татсан “China Daily” сонинд дурдсанаар дэлхийн цоохор ирвэсийн нийт тархац нутгийн 60 гаруй хувь нь Хятадын нутаг дэвсгэрт байдаг.
Энэ үзүүлэлтээр Хятад улс цоохор ирвэсийн тархац нутаг төдийгүй тоо толгойн хэмжээгээр дэлхийд тэргүүлж байгаа аж.
“Уулын эзэн” хэмээн нэрлэгддэг цоохор ирвэс Хятадад нэгдүгээр зэрэглэлийн тусгай хамгаалалттай амьтдын ангилалд багтдаг. Түүний тоо толгой, тархац нутаг тогтвортой байх нь өндөр уулын экосистемийн эрүүл, тэнцвэртэй байдлыг илэрхийлэх нэг чухал үзүүлэлт болдог байна.
800 мянга гаруй ам км нутгийг хамгаалалтад авчээ
Цоохор ирвэсийн амьдрах гол бүсүүдэд байгуулсан үндэсний хоёр цэцэрлэгт хүрээлэн болон 78 тусгай хамгаалалттай газар нийт 800 мянга гаруй хавтгай дөрвөлжин километр нутаг дэвсгэрийг хамарч байна.
Энэ нь цоохор ирвэс нутаглах боломжтой нийт газрын бараг 40 хувьтай тэнцэх хэмжээ юм.
Ийнхүү хамгаалалтын бүсийг өргөжүүлснээр зөвхөн цоохор ирвэсийн популяцийг өсгөхөөс гадна түүний идэш тэжээл, амьдрах орчин болон өндөр уулын экосистемийг бүхэлд нь хамгаалах нөхцөл бүрджээ.
Алга болсон бүсэд дахин нутагшуулж эхлэв
Хятад улс цоохор ирвэс үзэгдэхээ больсон зарим бүс нутагт популяцийг нь сэргээх ажилд мөн анхаарч байна.
Тухайлбал, Хэлан уулсын бүсэд цоохор ирвэсийг сэргээн нутагшуулах анхны хөтөлбөрийг хэрэгжүүлж эхэлжээ. Энэхүү ажил нь өмнө нь нутаглаж байсан бүсэд нь цоохор ирвэсийн тогтвортой популяцийг дахин бий болгох зорилготой байна.
Хамгаалалтын бүсүүдийг нэмэгдүүлэх, амьдрах орчныг сэргээх болон популяцийг урт хугацаанд хянах арга хэмжээний үр дүнд Хятадын цоохор ирвэсийн тоо 2013 оноос хойш 2500 орчмоос 5000 орчим болж өсөөд байна.
