Найруулагч Б.Чингүүний “Dzud” уран сайхны кино олон улсын кино наадмуудад амжилтаа үргэлжлүүлж байна. Тус бүтээл Италийн Милан хотод зохион байгуулсан “Milan Independent Film Festival”-аас шилдэг киноны шагнал хүртжээ.
“Dzud” киноны үйл явдал өвлийн хатуу ширүүн нөхцөлд өрнөх бөгөөд хүн, байгаль, амьтны харилцан хамаарлыг амьдралын тэмцэлтэй холбон өгүүлдэг. Байгалийн сорилттой нүүр тулсан хүмүүсийн ахуй, тэсвэр хатуужлыг киноны гол сэдэв болгосон байна.
Олон улсын наадмуудад дараалан шалгарчээ
“Dzud” өнгөрсөн долдугаар сард Туркийн “Anatolia International Film Festival”, Унгарын “Director’s Cut International Film Festival”-ийн сүүлийн шатанд шалгарсан юм. Үүний дараа наймдугаар сард “New York Movie Awards 2026”-аас шилдэг киноны шагнал болон гранпри хүртжээ.
Мөн Шведийн “Stockholm City Film Festival”-д шилдэг кино, шилдэг найруулагчийн номинацид шалгарсан байна. Ийнхүү бүтээл Европ болон АНУ-ын хэд хэдэн кино наадамд дараалан оролцож, шагнал хүртээд байгаа юм.
Б.Чингүүний найруулсан “Dzud” тун удахгүй Португалд болох олон улсын кино наадамд өрсөлдөхөөр шалгарчээ. Миланы кино наадмын шилдэг бүтээл болсон амжилтынхаа дараа тус кино олон улсын фестивалийн аяллаа үргэлжлүүлэхээр байна.
