Азийн тэргүүлэх хөгжмийн фестивал болох зорилготой “Playtime Festival” наадам 2027 оны долоодугаар сарын 2-ноос 4-ний өдрүүдэд Плэйтайм хүрээлэнд 25 жилийн ойн түүхэн баяраа гурван өдрийн турш тэмдэглэх гэж байна.
Энэхүү ойн хүрээнд үнэнч үзэгчдэдээ зориулан “Early Bird” тасалбарын борлуулалтыг албан ёсоор эхлүүлсэн бөгөөд 2026 оны долоодугаар сарын 31-нээс наймдугаар сарын 10-ны 18:00 цаг хүртэл үндсэн үнээс 60 хувийн хөнгөлөлттэй буюу 290,000 төгрөгөөр худалдан авах боломжтой.
25 жилийн ойн хүрээнд хийгдэх шинэчлэл, онцлогууд
Анх 2002 онд зохион байгуулагдаж эхэлсэн тус наадам нь ирэх дараагийн 25 жилийн хөгжлийг эхлүүлэх зорилгоор доорх шинэчлэлтүүдийг хэрэгжүүлж байна:
- Уран бүтээлчдийн бүрэлдэхүүн (Lineup): Олон улсын болон дотоодын уран бүтээлчдийг урихад өмнөх жилийнхээс хоёр дахин их төсөв зарцуулж, наадмын түүхэн дэх хамгийн хүчтэй бүрэлдэхүүнийг бүрдүүлнэ.
- Технологи ба дэд бүтэц: Тайзны бүтээн байгуулалт, гэрэлтүүлэг, дуу дүрсний стандарт, талбайн дэд бүтэц, аюулгүй байдал болон үйлчилгээний чанарыг олон улсын дэлхийн жишигт нийцүүлэн иж бүрэн шинэчилнэ.
- Тасалбар худалдан авах: Тасалбарыг албан ёсны playtimefestival.com вебсайт болон Shoppy.mn платформоор худалдаалж байна.
Анх 2002 онд эхэлсэн “Playtime Festival” нь Монголын орчин үеийн хөгжмийн урсгалыг түүчээлээд зогсохгүй олон улсад соёл, аялал жуулчлалыг сурталчлах том арга хэмжээ болон өргөжсөн. Наадмыг зохион байгуулагчид цаашид Азийн тэргүүлэх хөгжмийн фестивалиудын эгнээнд байр сууриа бэхжүүлж, бүтээлч үйлдвэрлэлийг хөгжүүлэх урт хугацааны зорилгоо бодитоор хэрэгжүүлж байна.
