Брэд Питт, Анжелина Жоли нарын олон жил үргэлжилсэн зөрчил дахин олны анхааралд орлоо. Энэ удаа маргаан тэдний өргөмөл охин Захара Спелман коллежоо төгссөнтэй холбоотойгоор үүсжээ.
Олон нийтийн сүлжээнд Питтийг охиныхоо төгсөлтийн ёслолд ирээгүй, мөн чухал өдрөөр нь баяр хүргээгүй гэх шүүмжлэл гарсан байна. Гэвч жүжигчний ойрын хүрээнийхэн Radar Online-д өгсөн мэдээлэлдээ энэ байдлыг өөрөөр тайлбарлажээ.
Тэдний хэлснээр, Питт ёслол яг хэзээ болохыг мэдээгүй байсан бөгөөд түүнд төгсөлтийн талаарх мэдээлэл зориуд хүргээгүй гэж үзэж байгаа аж. Эх сурвалжийн өгүүлснээр, жүжигчин өөрийг нь гэр бүлийн үйл явцаас бүрэн тусгаарласан атлаа дараа нь олон нийтийн өмнө буруутай мэт харагдуулж байна гэж бухимдсан байна.
Питтийн талын эх сурвалж Анжелина Жолиг энэ нөхцөлд түүнийг “санаачилга гаргаагүй” гэж буруутгаж байгаа гэж ярьжээ. Жолигийн байр суурь нь Питт охиныхоо төгсөх жилийг өөрөө мэдэж, очихын тулд хүчин чармайлт гаргах ёстой байсан гэх агуулгатай байсан гэж мэдээлсэн байна.
Хуучин гэр бүлийн зөрчил хүүхдүүдэд нөлөөлж байна
Питтийн найзууд түүний эсрэг гарсан шүүмжлэлийг шударга бус гэж үзэж байна. Тэдний тайлбарласнаар, жүжигчин олон жилийн турш хүүхдүүдийнхээ амьдралд бүрэн оролцох боломжгүй байсан нөхцөлд түүнийг гэнэт идэвхгүй гэж буруутгах нь нэг талыг барьсан дүгнэлт аж.
Мөн тэд Питт төгсөлтийн ёслолд гэнэт очсон бол хэвлэл, папараццийн анхаарал Захарагийн баяраас илүү түүн дээр төвлөрөх байсан гэж үзжээ. Тиймээс ийм нөхцөл байдал охины хувьд таагүй уур амьсгал үүсгэж болзошгүй байсан гэж эх сурвалжууд тайлбарласан байна. Тэд мөн Питт охиндоо ямар ч бэлэг өгөөгүй гэх мэдээллийг няцаажээ.
Radar Online-ийн эх сурвалжуудын мэдээлснээр, Брэд Питт, Анжелина Жоли нарын удаан үргэлжилсэн зөрчил хүүхдүүдэд нь улам хүндээр тусч байгаа аж. Тэд эцэг эхийнхээ маргаан дуусахыг хүсдэг бөгөөд гэр бүлийн дотоод хурцадмал байдал бүх талд сэтгэлзүйн дарамт болж байна гэж ойрын хүмүүс нь ярьжээ.
Нөхцөл байдлыг улам хүндрүүлэх нэг хүчин зүйл нь Анжелина Жоли зуны сүүлээр хүүхдүүдийн хамт удаан хугацаагаар гадаадад явах төлөвлөгөөтэй гэх мэдээлэл юм. Энэ нь Питт болон хүүхдүүдийн хоорондын харилцаанд дахин шинэ саад үүсгэж болзошгүй гэж эх сурвалжууд үзэж байна.
