Их Британид нохойн таргалалт ноцтой асуудал болж байгааг гэрийн тэжээвэр амьтдын эзэдтэй хийсэн шинэ судалгаа харуулжээ. Daily Record-ийн мэдээлснээр, илүүдэл жинтэй нохдын эзлэх хувиар Эдинбург хот улсдаа тэргүүлсэн байна.
Судалгааг амьтны хоол тэжээлийн чиглэлээр ажилладаг Bella+Duke компани хийсэн бөгөөд Их Британийн 2 000 гаруй нохой эзэмшигч оролцжээ. Тэднээс өөрсдийн тэжээвэр амьтдын биеийн байдлыг үнэлэхийг хүссэн байна.
Эдинбургийн нохой эзэмшигчдийн 86 хувь нь тэжээвэр амьтан нь илүүдэл жинтэй эсвэл таргалалттай гэж үзжээ. Энэ нь Их Британийн дундаж үзүүлэлт болох 54 хувиас мэдэгдэхүйц өндөр дүн юм.
Илүүдэл жинтэй нохдын үзүүлэлтээр тэргүүлсэн хотууд:
- Эдинбург — 86%
- Глазго — 67%
- Ливерпуль — 65%
- Кардифф
- Шеффилд
Судалгааны зохиогчид Эдинбургийн үзүүлэлтийг гэнэтийн үр дүн гэж тайлбарлажээ. Учир нь тус хот олон цэцэрлэгт хүрээлэн, ногоон бүс, нохой салхилуулахад тохиромжтой зам талбай ихтэйд тооцогддог.
Илүүдэл жин нохойн эрүүл мэндэд аюултай
Малын эмч Каролайн Чичерогийн анхааруулснаар, нохойн таргалалт нь зөвхөн гоо зүйн асуудал биш, эрүүл мэндийн ноцтой эрсдэл юм. Илүүдэл жин нь амьтны зүрх, үе мөчинд нэмэлт ачаалал өгч, хөдөлгөөнийг хязгаарладаг байна.
Мөн таргалалт нь үе мөчний үрэвсэл, чихрийн шижин, зүрх судасны өвчин үүсэх магадлалыг нэмэгдүүлж, нохойн наслах хугацааг богиносгож болзошгүй гэж мэргэжилтнүүд үзэж байна. Судалгааны дүнгээс харахад Их Британид гэрийн тэжээвэр нохдын хооллолт, хөдөлгөөний дэглэмд илүү анхаарах шаардлага нэмэгдэж байна.
