Боловсролын салбарын үйл ажиллагааг иргэдэд илүү ойртуулж, хүнд суртлыг багасгах зорилготой “Чөлөөлье” санаачилга өнөөдөр Д.Сүхбаатарын талбайд албан ёсоор эхэллээ. 2026 оны 5 дугаар сарын 11-нээс 13-ны өдрүүдэд үргэлжлэх тус өдөрлөгт Боловсролын яамны харьяа агентлагууд, төрийн өмчийн их сургуулиуд болон политехникийн коллежууд нэгдэн, өөрсдийн үйлчилгээгээ олон нийтэд танилцуулж байна. Өдөрлөгийн нээлтийн үеэр Боловсролын яамны Төрийн нарийн бичгийн дарга Т.Ням-Очир үг хэлж, салбарын шинэчлэлийн ач холбогдлыг онцоллоо.
Өдөрлөгийн эхний өдөр буюу 5 дугаар сарын 11-нд Боловсролын ерөнхий газраас иргэдэд дараах чиглэлээр цогц мэдээлэл, зөвлөгөөг хүргэж байна. Үүнд:
- Хүүхдийн хоол ба шим тэжээл: Цэцэрлэг, ЕБС-ийн хоол үйлдвэрлэлийн өнөөгийн байдал, шим тэжээлийн стандартыг танилцуулж байна. Иргэд хоолны чанарыг сайжруулах талаар саналаа өгөхөөс гадна мэргэжлийн арга зүйчдээс зөвлөгөө авах боломжтой.
- Насан туршийн суралцахуй: Иргэдийн хувь хүний хөгжил, бичиг үсгийн боловсрол болон мэргэжлийн чиг баримжаа олгох сургалтуудыг танилцуулж байна. Өнөөдөр Сүхбаатар, Баянзүрх, Налайх дүүргийн төвүүд оролцож байгаа бөгөөд иргэд гар урлал болон өөрийгөө хөгжүүлэх сургалтуудыг түлхүү сонирхож байна.
- Цахим үйлчилгээ ба баримт бичиг: Боловсролын гэрчилгээ, дипломыг цахимжуулах, үрэгдүүлсэн баримт бичгийг нөхөн олгох болон гадаадад төгсөгчдийн дипломыг дүйцүүлэх талаарх зааварчилгааг газар дээр нь өгч байна.
Тус өдөрлөг нь боловсролын үйлчилгээг нэг цэгээс, шуурхай авах боломжийг олгож байгаагаараа онцлогтой юм. Иргэд та бүхэн Төв талбайг зорин ирж, салбарын шинэчлэлтэй танилцан, хэрэгцээт мэдээллээ авах боломжтой.
