Google компани YouTube платформ дахь видео контентыг хайх, дүн шинжилгээ хийх зориулалттай “Ask YouTube” хэмээх туршилтын чатботыг ажиллуулж эхэллээ. Энэхүү шинэ хэрэгсэл нь хэрэглэгчдэд нарийн төвөгтэй асуулт асуух, дэлгэрэнгүй хариулт авах, видео бичлэгийн тодорхой хэсгийг цаг хугацаатай нь (time-code) харах, мөн дараагийн тодруулга асуултуудыг асуух боломжийг олгож байгаа юм.
Энэ талаар “Engadget” хэвлэл мэдээллээ. Уг функцийг одоогоор АНУ-ын 18-аас дээш насны “Premium” хэрэглэгчид “YouTube Labs” үйлчилгээгээр дамжуулан зургаадугаар сарын 8-ныг хүртэл турших боломжтой. Үүнийг ашиглахын тулд бүртгэл дээрээ идэвхжүүлэх шаардлагатай бөгөөд үүний дараа хайлтын хэсэгт “Ask YouTube” товчлуур гарч ирэх ажээ.
Жишээлбэл, чатбот нь “Аполлон-11” хөлгийн даалгаврыг товчлон тайлбарлаж, холбогдох дүрс бичлэгийн хэсгүүдийг санал болгож чадна. Гэвч уг үйлчилгээг туршиж үзсэн сэтгүүлчдийн хэлснээр, зарим тохиолдолд систем ердийн видео жагсаалт гаргаж өгөх эсвэл хариултдаа баримтын алдаа гаргах тохиолдол байгааг тэмдэглэжээ.
“Google-ийн энэхүү алхам нь хиймэл оюун ухааныг өөрийн үйлчилгээнүүдэд нэгтгэх эрмэлзлийг харуулж байна. Гэсэн хэдий ч хэрэглэгчдийн хандлага хоёрдмол хэвээр байгаа бөгөөд тэд хиймэл оюун ухаанаар бүтээсэн контентод шүүмжлэлтэй хандаж, шинэ шийдлүүдээс юун түрүүнд хайлтын чанар, тав тухыг хүлээж байна” гэж “Engadget” онцолсон байна.
