Ирэх зургаадугаар сард Баянхонгор аймгийн нутагт орших Их Богд хайрхны тэнгэрийг тайх төрийн тахилгын ёслол болохоор товлогдлоо. Монгол Улсын Ерөнхийлөгчийн зарлигийн дагуу зохион байгуулагдах энэхүү түүхэн үйл ажиллагаа 2026 оны зургаадугаар сарын 3-ны өдөр тохиох юм байна.
Их Богд хайрхныг төрийн тахилгатай уулсын жагсаалтад багтаах шийдвэрийг анх 2020 оны аравдугаар сарын 28-ны өдөр Монгол Улсын Ерөнхийлөгч гаргаж байсан түүхтэй. Тухайн үед Баянхонгор аймгийн Иргэдийн Төлөөлөгчдийн Хурлаас ирүүлсэн санал, хүсэлтийг дэмжиж, Үндсэн хууль болон Ерөнхийлөгчийн тухай хуулийн холбогдох заалтуудыг үндэслэн тус хайрхныг төрийн хамгаалалтад авч, тахихаар зарлиг болгосон билээ.
Монголын уламжлалт зан заншил болон төрийн тахилгын дүрмийн дагуу ийм төрлийн уул, хайрхныг таван жил тутамд нэг удаа тайж тахидаг журамтай. Энэхүү тогтсон хугацааны дагуу Их Богд хайрхныг тахих ээлжит ёслол энэ онд тохиож байгаа нь нутгийн ард иргэд болон сүсэгтэн олны хувьд хүлээлт үүсгэсэн чухал үйл явдал болж байна.
