Улсын хэмжээнд гол, усанд осолдох тохиолдол буурахгүй, иргэдийн сонор сэрэмж сул байгааг харуулсан харамсалтай статистик мэдээ гарлаа. Тухайлбал, сүүлийн таван жилийн хугацаанд усны аюулаас болж нийт 464 хүн амь наснаасаа сэргийлж чадалгүй эндсэний 105 нь хүүхэд байжээ.
2026 оны статистикаар осол 20 гаруй хувиар өсжээ
Эдгээр осол нь ихэвчлэн гол усанд сэлэх, хүүхдийг хараа хяналтгүй орхих, архи согтууруулах ундаа хэрэглэсэн үедээ усанд орох зэрэг хариуцлагагүй байдлаас үүдэлтэй байна. Түүнчлэн нийт тохиолдлын зургаан хувь нь хийлдэг гудас болон завьнаас унах, эсвэл ажлын байрны хөдөлмөр хамгааллын дүрмийг мөрдөөгүйн улмаас гарчээ.
Зөвхөн 2026 он гарсаар усны ослын 84 тохиолдол бүртгэгдэж, 50 хүн амь насаа алдсан нь өнгөрсөн оны мөн үетэй харьцуулахад 20 гаруй хувиар өссөн үзүүлэлт юм. Азаар энэ хугацаанд онцгой байдлын байгууллагын алба хаагчид шуурхай ажиллан 139 хүний амь насыг авран хамгаалж, шаардлагатай тусламж үйлчилгээг үзүүлж чадсан байна.
Осол их гардаг 399 цэгт эргүүл томилон ажиллаж байна
Онцгой байдлын байгууллагаас хийсэн судалгаагаар улсын хэмжээнд усны осол хамгийн их гардаг эрсдэлтэй 399 “хар цэг”-ийг тогтоон тэмдэглээд байна. Иймд энэ оны зургаадугаар сарын 15-ны өдрөөс эхлэн сэрэмжлүүлэг, урьдчилан сэргийлэх хөдөлгөөнт эргүүлийг ажиллуулж эхэлжээ.
Уг хөдөлгөөнт эргүүлийн хүрээнд Онцгой байдал, цагдаа, хүүхэд гэр бүл хөгжил хамгааллын байгууллагын 250 орчим ажилтан, алба хаагчид дараах бэлэн байдлыг ханган ажиллаж байна.
- Эрсдэл бүхий томоохон гол, мөрөн, нуурын дагуу 47 чиглэлд эргүүл хийх;
- Нийт 37 автомашин, 22 завь, 12 мотоциклтойгоор үүрэг гүйцэтгэх;
- Иргэдэд аюулгүй байдлын сэрэмжлүүлэг мэдээллийг тасралтгүй хүргэх.
Холбогдох албаны байгууллагуудаас иргэд, олон нийтийг үер, усны болон авто замын осол аюулаас урьдчилан сэргийлж, сонор сэрэмжээ дээшлүүлэхийг онцгойлон уриаллаа.
