Улаанбаатарын суурьшлын бүс рүү баавгай орж ирсэн тухай дуудлага энэ жил хэд хэдэн удаа бүртгэгдсэн байна. Наймдугаар сарын 11-нээс хойш нийт долоон дуудлага ирсэн бөгөөд нийслэлийн Байгаль орчны газрын мэргэжилтнүүд хоёр баавгайг барьж, хүн ам төвлөрсөн газраас ойролцоогоор 180 км зайтай Төв аймгийн Эрдэнэ сумын нутагт шилжүүлжээ.
Нийслэлийн Байгаль орчны газрын Амьтан, ургамлын асуудал хариуцсан ахлах мэргэжилтэн Д.Баньдын мэдээлснээр нийслэлийн ногоон бүсэд баавгай тогтмол нутаглаж байгаа нь өмнөх судалгаануудаар тогтоогдсон байна.
Сэлбэ, Улиастайн голын эхээр баавгай нутаглаж байгааг камерын судалгаагаар тогтоожээ
ШУА-ийн Биологийн хүрээлэн 2022-2024 онд автомат камер ашиглан судалгаа хийхэд Сэлбийн голын эх болон Улиастайн голын эх орчимд тус бүр нэг баавгай нутаглаж байгааг баталгаажуулжээ. Өмнөх жилүүдэд ч баавгай суурьшлын бүс рүү нэвтэрсэн тохиолдол бүртгэгдэж байсан байна.
Тодруулбал, 2018 онд нэг, 2019 онд хоёр, 2020 онд нэг удаа ийм дуудлага иржээ. Харин 2026 оны эхний бүртгэл наймдугаар сарын 11-нд Сүхбаатар дүүргийн 19 дүгээр хороо, Баянгийн эх орчимд гарсан бөгөөд үүний дараа иргэдэд сэрэмжлүүлэг хүргэж эхэлсэн байна.
Мөн наймдугаар сарын 30-нд Богдхан ууланд баавгай үзэгдсэн тухай мэдээлэл иржээ. Үүнээс хойш мэргэжлийн баг тухайн бүсүүдэд хяналт тавьж, суурьшлын хэсэгт орж ирсэн амьтдыг холдуулах арга хэмжээ авч байгаа аж.
Хоолны үнэр баавгайг олон километрийн цаанаас татах эрсдэлтэй
Д.Баньдын хэлснээр баавгай хоол тэжээлийн үнэрийг 25-30 км-ийн зайнаас мэдрэх чадвартай. Иймээс гэр, өвөлжөө, хаваржааны ойролцоо малын сэг зэм, хүнсний үлдэгдэл байлгах нь зэрлэг амьтан татах эрсдэлийг нэмэгдүүлдэг байна.
Тэрбээр малын сэг зэмийг айл, суурьшлын хэсгээс аль болох холдуулж, булж устгахыг зөвлөжээ. Мөн хадлан бэлтгэх, жимс түүх болон хөдөө орон нутагт зорчих үед хоолны үлдэгдлийг ил задгай орхихгүй, битүү саванд хадгалах шаардлагатайг сануулсан байна.
Ой модтой бүсээр зорчихдоо мөн анхаарал болгоомжтой байхыг зөвлөжээ. Ялангуяа баавгайн идэвхтэй үе дуусаагүй байгаа тул иргэд зэрлэг амьтантай гэнэт таарах эрсдэлийг тооцох хэрэгтэй гэж мэргэжилтнүүд үзэж байна.
Аравдугаар сарын дундаас ичээндээ орж эхэлдэг
Баавгай аравдугаар сарын дунд үеэс арваннэгдүгээр сарын эх хүртэл ичээндээ ордог байна. Тиймээс энэ хугацаа хүртэл суурьшлын бүсэд үзэгдэх эрсдэл хэвээр байгаа тул нийслэлийн Байгаль орчны газраас хяналт, хамгаалалтын ажлаа үргэлжлүүлж байгаа аж.
Тус байгууллагад суурьшлын бүсэд нэвтэрсэн баавгайтай ажиллах 2-3 хүний бүрэлдэхүүнтэй мэргэжлийн баг тогтмол ажиллаж байна. Иргэд баавгай харсан тохиолдолд өөрсдөө ойртож, үргээх оролдлого хийхээс зайлсхийж, холбогдох байгууллагад шуурхай мэдээлэх шаардлагатай.
Баавгай суурьшлын хэсэгт үзэгдвэл нийслэлийн Байгаль орчны газрын 7272-0303, нийслэлийн Шуурхай удирдлага, зохицуулалтын төвийн 1131-0005 дугаарт мэдээлэх боломжтой гэж НЗДТГ-аас мэдэгджээ.
