Кыргызстан улс түүхэндээ анх удаа өөрийн хиймэл дагуулыг сансарт хөөргөлөө. Энэ талаар тус улсын Ерөнхийлөгчийн Тамгын газар Telegram сувгаараа мэдээлэв.
“Бүгд Найрамдах Кыргыз Улсын Ерөнхийлөгч Садыр Жапаров өнөөдөр, 10-р сарын 1-нд (АНУ-ын Баруун эргийн цагаар — ред.) Америкийн Нэгдсэн Улсад хийж буй ажлын айлчлалынхаа хүрээнд Кыргыз Улсын анхны үндэсний хиймэл дагуулыг хөөргөх ёслолд оролцлоо. Хиймэл дагуулыг Калифорни мужийн Ванденбергийн Агаарын цэргийн баазаас SpaceX компанийн Falcon 9 зөөгч пуужингаар хөөргөсөн. Тус хиймэл дагуулыг нэг зөөгч пуужингаар хөөргөсөн сансрын аппаратуудын хамт тойрог замд орууллаа. Хиймэл дагуулыг Бишкек хотод байрлах удирдлагын төвөөс удирдана” гэж мэдээлэлд дурджээ.
Хиймэл дагуулыг хөөргөснөөр хөдөө аж ахуйн газар, мөсөн гол, усан сан, ой, бэлчээрийг хянах, байгалийн экосистемийн өөрчлөлтийг ажиглах, мөн газрын хэвлийг хууль бусаар ашигласан тохиолдол, зөвшөөрөлгүй хогийн цэг болон бусад бохирдлын эх үүсвэрийг илрүүлэх боломж бүрдэхийг онцолсон байна.
“Байгалийн эрсдэлийг хянах, эрт илрүүлэхэд хиймэл дагуулын технологи онцгой ач холбогдолтой. Хүлээн авах мэдээллийн тусламжтайгаар ган гачиг, үер, хөрсний гулгалт, үерийн шавар урсгал, ойн түймрийн шинж тэмдгийг илүү шуурхай илрүүлж, цаг тухайд нь арга хэмжээ авах, болзошгүй хохирлыг бууруулах нэмэлт боломж бүрдэнэ. Ингэснээр төрийн шийдвэр гаргалт, хөрөнгө оруулалтын төлөвлөлт болон төрийн хөтөлбөрүүдийн хэрэгжилтэд хяналт тавихдаа бодит мэдээлэл ашиглах боломжтой болно” гэж мэдэгдэлд дурджээ.
