“IEM Cologne Major 2026” тэмцээнээс хасагдах уу, эсвэл плей-оффт үлдэх үү гэдгийг шийдэх хамгийн хариуцлагатай тулаанд Монголын The MongolZ баг Өмнөд Америкийн 9z Team-д 0:2 харьцаатайгаар ялагдаж, тэмцээнийг албан ёсоор орхилоо. Манай залуус Inferno болон Overpass газрын зургуудад хоёуланд нь 8:13 гэсэн ижил харьцаатайгаар бүдэрсэн байна.
Тоглогчдын үзүүлэлт ба тоглолтын MVP
Энэхүү цувралд 9z Team-ийн залуус тактик болон буудлагын хувьд илүү байж чадлаа.
- dgt (MVP): Тэрээр цувралын турш 44-21 K/D харьцаатай, 1.76 гэсэн үнэмлэхүй өндөр рейтингтэй тоглож, багтаа ялалт авчирсан гол баатар болов.
- mzinho: Манай багийн бүрэлдэхүүнээс ганцаараа эерэг буюу 1.27 рейтингтэй тоглож, багаа чирэхийг хичээлээ.
- Techno: Харамсалтай нь энэ цувралын хамгийн тааруу үзүүлэлттэй тоглогч боллоо (15-28 K/D, 0.59 рейтинг).
Түүхэн уналт ба давуу талаа алдсан алдаанууд
Манай “The MongolZ” баг сүүлийн хоёр жилийн хугацаанд анх удаагаа Мэйжор тэмцээний плей-оффын шатанд шалгарч чадалгүй хасагдаж байна.
Тэмцээний туршид манай залууст ажиглагдсан гол дутагдал нь авсан давуу талаа эцсээ хүртэл хадгалж үлдэж чадахгүй байсан явдал юм. Тэд хэсгийн шатанд BetBoom Team, B8, болон NAVI багуудын эсрэг тоглохдоо тооны харьцаагаар хол илүүрхэж байсан ч өрсөлдөгчдөө гурван ч удаа том хэмжээний эргэн ирэлт (comeback) хийх боломжийг олгосон нь ийнхүү сэтгэл зүй болон үр дүнд сөргөөр нөлөөллөө. Энэ бол маш том сургамж бөгөөд дараа дараагийн тэмцээнд засах биз ээ.
“IEM Cologne Major 2026” тэмцээн 6 дугаар сарын 2-ноос 21-ний өдрүүдэд Германы Кёльн хотноо үргэлжлэн явагдаж байна. Нийт 32 баг оролцсоноос шилдэг 8 баг плей-оффын шатанд тулалдах хуваарьтай бөгөөд тэмцээний нийт шагналын сан $1,250,000 ам.доллар юм. Манай баг тамирчид энэхүү тэмцээнд 1xBet платформын албан ёсны дэмжлэгтэйгээр эцсээ хүртэл дайчин тулалдлаа. Уналт бүрийн ард босолт байдаг тул багийн залуустаа дараагийн тэмцээнүүдэд нь илүү их амжилтыг хүсье!
