Хөвсгөл аймаг БНСУ-ын Морин уралдааны агентлагтай адууны соёлын чиглэлээр хамтын ажиллагаагаа өргөжүүлэх санамж бичиг байгуулжээ. Хоёр талын хамтын ажиллагааны гол ажлын нэг нь Хөвсгөлд адууны соёлын цогцолбор байгуулж, түүнийг аялал жуулчлал болон орон нутгийн хөгжлийн төсөлтэй уялдуулах явдал байна.
Санамж бичгийг Сөүл хотод байгуулсан бөгөөд Монголын талаас УИХ-ын гишүүн Б.Бат-Эрдэнэ, Хөвсгөл аймгийн ИТХ-ын дарга Д.Пүрэвдорж нар оролцжээ. Талууд зөвхөн дэд бүтэц байгуулахаас гадна Монгол, Солонгосын адууны соёлын солилцоог идэвхжүүлж, Азийн хэмжээнд түгээн хөгжүүлэхээр зорьж байгаа аж.
Монгол адуучдыг БНСУ-д ажиллуулах боломжийг судалж байна
Хамтын ажиллагааны хүрээнд морь сургагч болон адуу арчилгааны ажилтнуудын мэргэжлийн шалгуур, ур чадварын үнэлгээг шинэчлэхээр ажиллаж байгаа талаар мэдээлжээ. Ингэснээр хоёр орны хооронд мэргэшсэн хүний нөөцийн солилцоог нэмэгдүүлэх нөхцөл бүрдүүлэх зорилготой байна.
УИХ-ын гишүүн Б.Бат-Эрдэнийн мэдээлснээр Монгол Улсад албан ёсоор хүлээн зөвшөөрөгдсөн мэргэжлийн ур чадвартай адуу маллагчдыг БНСУ-д ажиллуулахдаа E-7 ангиллын виз авах боломж бүрдүүлэх чиглэлээр ажиллаж байгаа аж. Гэхдээ энэ нь одоогоор хэрэгжиж эхэлсэн тогтолцоо бус, боловсруулж буй зохицуулалт гэдгийг эх мэдээллээс харж болно.
Морьт харваа, морин дээрх бөхийг олон улсын түвшинд хөгжүүлэхээр зорьжээ
Цаашид морьт харваа, морин дээрх бөх зэрэг уламжлалт морин спортын төрлүүдэд нэгдсэн дүрэм, стандарт бий болгох асуудлаар хамтран ажиллахаар төлөвлөсөн байна. Улмаар эдгээр төрлийг олон улсын тэмцээн, арга хэмжээний түвшинд хөгжүүлэх урт хугацааны зорилго тавьжээ.
Үүнтэй холбоотойгоор БНСУ-ын Морин уралдааны агентлаг /KRA/-ийг түшиглэн олон улсын морин спортын хөгжлийг дэмжих төлөвлөгөө боловсруулах ажил явагдаж байгаа аж. Хөвсгөлд байгуулах цогцолбор ч энэ хамтын ажиллагааны хүрээнд адууны соёл, спорт, аялал жуулчлал болон мэргэжлийн сургалтыг нэг дор хөгжүүлэх чиглэлтэй байх төлөвтэй байна.
