Дорнод аймаг дахь сум дундын анхан шатны шүүхээс 2026.08.19-ний өдөр Г.Адилбишид таслан сэргийлэх арга хэмжээ авах прокурорын саналыг хэлэлцлээ. Шүүхээс түүнийг урьд авсан арга хэмжээг зөрчин, дуудсан хугацаанд ирээгүй бөгөөд гэмт хэрэг үйлдэж болзошгүй гэж үзэн 30 хоногийн хугацаатай цагдан хорихоор шийдвэрлэсэн байна.
Сэжигтнийг цагдан хорих болсон үндэслэл
Сүхбаатар аймагт газрын тосны хайгуул хийж байсан хятад иргэдийн эрх чөлөөнд халдсан гэх хэрэгт Г.Солонго, Г.Адилбиш нарыг хуулийн байгууллагаас хойшлуулшгүйгээр саатуулан шалгаж байсан юм. Өмнө нь Г.Солонгыг 2024 оны хэрэгтэй нь холбогдуулан 30 хоног хорих шийдвэр гаргаад байсан бол өчигдөр өмгөөлөгчтэйгөө оролцох хүсэлт гаргасан Г.Адилбишийг ийнхүү шүүхээс өнөөдөр цагдан хорихоор болов.
2024 онд үйлдсэн хэргийн тухай
Г.Солонго, Г.Адилбиш нарт холбогдох 2024 оны хэрэг нь Дорнод аймгийн Матад, Халх гол сумдын нутаг дэвсгэрт гарсан байдаг. Тэднийг тухайн бүс нутагт үйл ажиллагаа явуулдаг хэд хэдэн байгууллагын хэвийн ажиллагааг алдагдуулж, иргэдийн биед халдсан хэмээн яллагдагчаар татан шалгаж байгаа аж.
- БНХАУ-ын 100 хувийн хөрөнгө оруулалттай “Петро Чайна Дачин Тамсаг” ХХК-ийн үйл ажиллагааг зогсоохыг шаардан, ажлыг нь саатуулсан,
- Тус компанийн хашаа руу нэвтрэхээр хамгаалалтын ажилчдад хүч хэрэглэн, “Хужаагийн боол, хужаа нараа хамгааллаа” хэмээн гутаан доромжилж олон нийтийн амгалан тайван байдлыг алдагдуулсан,
- Туслан гүйцэтгэгч компанийн ажилтнуудыг хэл амаар доромжлон, техник хэрэгслийг нь унтрааж саатуулсан,
- Ажилтнуудын амрах сууцны доторх орчинд дуу-дүрсний бичлэг хийж, олон нийтэд тараасан,
- “Алтан дун дорнод монгол” компанийн байранд нэвтрэн иргэдийн биед халдаж, нэгнийх нь салтаа хэсэгт өшиглөж баруун төмсгийн зөөлөн эдийн няцрал гэмтэл учруулсан.
Дээрх хууль бус үйлдлүүдтэй холбогдуулан тэдэнд цагдан хорих таслан сэргийлэх арга хэмжээ авахаар шүүхээс шийдвэрлээд байна. Шүүхээс хэргийн ул мөр, эд мөрийн баримтыг устгах болон оргон зайлахаас урьдчилан сэргийлэх үүднээс ийнхүү хуулийн дагуу арга хэмжээ авжээ.
