Боловсролын яамнаас Элсэлтийн ерөнхий шалгалт (ЭЕШ) болон гүйцэтгэлийн үнэлгээний зохион байгуулалттай холбоотой шинэ мэдээллүүдийг танилцууллаа. Уг мэдээллээр ойрын хугацааны шалгалтын тов гарахаас гадна 2028 оноос эхлэн хэрэгжих томоохон шинэчлэлийн төлөвлөгөөг зарласан нь олны анхаарлыг татаж байна.
Энэ оны Элсэлтийн ерөнхий шалгалт зургаадугаар сарын 25-наас 28-ны өдрүүдэд зохион байгуулагдахаар товлогджээ. Шалгуулагчдын бүртгэлийн үйл ажиллагаа гуравдугаар сарын 4-ний өдөр эхэлсэн бөгөөд тавдугаар сарын 15-ныг дуустал үргэлжлэх юм байна.
Түүнчлэн олон улсын шалгалтын оноогоо ЭЕШ-тай дүйцүүлэх хүсэлтэй суралцагчдад зориулсан бүртгэл гуравдугаар сарын 9-нөөс зургаадугаар сарын 3-ны хооронд явагдана. Ингэснээр олон улсад хүлээн зөвшөөрөгдсөн сертификаттай сурагчид өөрийн оноогоо дотоодын их, дээд сургуульд элсэх оноонд шилжүүлэн тооцуулах боломжтой болох юм.
2028 оны шинэчлэл: Суралцах чадварын үнэлгээ рүү шилжинэ
Шалгалтын агуулга болон хэлбэрийн хувьд 2028 оны долоодугаар сар хүртэл одоогийн мөрдөж буй 10 хичээлийн хөтөлбөрийн дагуу шалгалтууд явагдана. Харин үүнээс хойш ЭЕШ-ын тогтолцоонд томоохон бүтцийн өөрчлөлт хийхээр төлөвлөжээ.
Шинэ тогтолцоонд шилжсэнээр дараах төрлийн шалгалтуудыг элсэлтийн үйл ажиллагаанд оруулж ирэх юм байна:
- Суралцах ерөнхий чадварыг сорих шалгалт;
- Судлагдахууны мэдлэгийг хоёр түвшинд буюу суурь болон ахисан түвшинд үнэлэх шалгалт;
- Практик ур чадварыг үнэлэх шалгалт;
- Англи хэлний олон улсын түвшин тогтоох шалгалтуудыг шууд дүйцүүлэн тооцох систем.
Энэхүү шинэчлэл нь сурагчдыг зөвхөн онолын мэдлэгээр бус, суралцах чадвар болон бодит ур чадвараар нь үнэлж, олон улсын жишигт нийцсэн боловсролын үнэлгээний тогтолцоог бүрдүүлэх зорилготой ажээ.
