Германы нийслэл Берлин хотод 15 өвчтөнөө санаатайгаар хордуулан амийг нь хөнөөсөн хэрэгт сэжиглэгдэж буй нэгэн паллиатив эмчийн шүүх хурал эхэллээ. Прокурорын мэдэгдсэнээр тэрээр “эмнэлгийн бэлдмэлийн үхлийн хольц” ашиглаж, хүмүүсийг амиа алдахад хүргэсэн бөгөөд зарим хохирогчдын гэрийг шатааж, хэргийн мөрийг балласан байна.
Хэргийг тоймлон
- Хэрэг 2021 оны есдүгээр сараас 2024 оны долдугаар сарын хооронд үйлдэгдсэн гэж таамаглаж байна
- Амиа алдсан хүмүүс: 12 эмэгтэй, 3 эрэгтэй, насны хувьд 25–94 насны хооронд
- Бүх хохирогч нь тухайн эмчийн паллиатив буюу сүүлчийн шатны тусламж авч байсан өвчтөнүүд
- Хэдийгээр тэдний онош нь эдгэршгүй байсан ч, аль ч тохиолдолд үхэл нь зайлшгүй биш байсныг прокурорууд онцолжээ
Эмч өвчтөнүүдийн зөвшөөрөлгүйгээр анестетик болон булчинг сулруулах үйлчилгээтэй бодис тарьж байсан. Судалгаагаар эдгээр бодис нь амьсгалын булчинг саажуулж, хэдхэн минутын дотор амьсгал боогдон үхэлд хүргэдэг байна.
Шүүх хурал ба гэрчүүд
Хэрэгт сэжиглэгдсэн эмч өөрийгөө гэм буруугүй гэж мэдүүлсэн бөгөөд нэр нь Германы хуулиар нууцалж байна. Шүүх хурал 2026 оны 1-р сар хүртэл үргэлжилж болзошгүй. Одоогоор:
- 150 орчим гэрчийг дуудах төлөвлөгөөтэй
- 13 хохирогчийн ар гэрийнхэн шүүхэд нэхэмжлэл гаргасан
Прокурорын зүгээс уг хэргийг төлөвлөгдсөн олон удаагийн хүн амины хэрэг хэмээн үзэж, онц ноцтой гэж тодорхойлжээ.
