2025 оны зургаадугаар сарын 3-ны энэ өдөр Өмнөд Солонгост Ерөнхийлөгчийн ээлжит сонгуулийн санал хураалт албан ёсоор эхэллээ. Улсын хэмжээнд 14,295 санал авах байр өглөөний 06:00 цагаас оройн 20:00 цаг хүртэл нээлттэй ажиллаж байна. Сонгогчид нийт таван нэр дэвшигчээс дараагийн таван жилийн Ерөнхийлөгчөө сонгох шийдвэр гаргах юм.
Урьдчилсан санал хураалт: Дээд амжилт тогтоов
Санал хураалтын өмнөх эрт санал хураалт тавдугаар сарын 29, 30-ны өдрүүдэд болж, түүхэн дээд ирцтэй явагдлаа. Энэ хугацаанд нийт сонгогчдын 34.74 хувь буюу 15 сая орчим хүн саналаа өгсөн нь тус улсын сонгуулийн түүхэнд өндөр тоонд тооцогдож байна.
Ерөнхийлөгчийн сонгуулийн нөхцөл байдал
Өглөөнөөс хойш гуравхан цагийн дотор нийт сонгогчдын 9.2 хувь буюу 4.09 сая орчим иргэн санал өгөөд байна. Санал хураалт 20:00 цагт хаагдмагц тооллого эхлэх бөгөөд шөнө дундын үед урьдчилсан үр дүн тодрох хүлээлттэй байна. Харин маргааш өглөөний 07:00–09:00 цагийн хооронд Үндэсний Сонгуулийн хороо албан ёсны дүнг зарлах юм.
Дараахан нь Үндэсний Ассамблейн танхимд тангараг өргөх ёслол болж, шинэ Ерөнхийлөгч ямар нэгэн шилжилтийн хугацаагүйгээр шууд ажилдаа орно.
Хэн нь ялалт байгуулах вэ?
Сонгуульд нийт таван нэр дэвшигч өрсөлдөж буй ч гол өрсөлдөөн Ардчилсан намаас нэр дэвшигч Ли Жэ Мён болон Ардын хүч намын Ким Мүн Сү хоёрын хооронд өрнөх нь тодорхой болсон. Урьдчилсан санал асуулгаар Ли 40 хувиар тэргүүлж, Ким 30 хувийн дэмжлэгтэйгээр удаалж байна.
Бусад нэр дэвшигчид:
- Ли Жүн Сок (Шинэчлэлийн нам),
- Квон Ён Гук (Ардчилсан хөдөлмөрийн нам),
- Сон Жин Хо (бие даагч)
Сонгуулийн хөтөлбөр: Эдийн засаг ба технологи
Ли, Ким нарын сонгуулийн гол амлалт нь эдийн засгийн өсөлтийг хангах бодлого байсан. Ялангуяа хиймэл оюун ухааны хөгжлийг дэмжих чиглэлээр онцгойлон анхаарахаа илэрхийлсэн. Мөн:
- Ли Жэ Мён: прагматик, олон талт дипломат бодлого явуулахаа амалсан.
- Ким Мүн Сү: Хойд Солонгосын цөмийн аюул заналхийллийн эсрэг хатуу байр суурь баримтлах болно гэж мэдэгдсэн.
Мөн хоёр нэр дэвшигч хоёулаа Ерөнхийлөгчийн одоогийн нэг удаагийн таван жилийн бүрэн эрхийг өөрчилж, хоёр удаа дөрвөн жилээр ажиллах тогтолцоонд шилжих санал дэвшүүлжээ.
