Rockstar Games компани Grand Theft Auto VI тоглоомын нээлтэд зориулсан нэг өдрийн хөгжмийн фестивалийг Майамид зохион байгуулахаар зарлалаа. Тайзнаа Travis Scott, Cardi B, Don Toliver болон тоглоомд дуу нь багтсан бусад уран бүтээлч тоглоно.
Axios-ийн мэдээлснээр, фестиваль GTA 6-ийн товлосон нээлтээс хоёр хоногийн дараа буюу 11-р сарын 21-нд Mana Wynwood талбайд болно. Арга хэмжээг PlayStation болон III Points хөгжмийн фестивалийн багтай хамтран зохион байгуулах аж.
Фестивалийн хоёр тайзан дээр GTA 6-ийн албан ёсны саундтрэкт бүтээл нь багтсан уран бүтээлчид тоглоно. Тэдний дунд:
- Travis Scott
- Don Toliver
- Cardi B
- Ca7riel & Paco Amoroso нар багтжээ. Францын электрон хөгжмийн Justice дуэт мөн тусгай DJ сет толилуулах юм.
Майами Vice City-ийн уур амьсгалд шилжинэ
Хөгжмийн фестиваль GTA 6-ийн сурталчилгааны кампанит ажлын нэг хэсэг болох бөгөөд Майамигийн хэд хэдэн газар тоглоомын үйл явдал өрнөдөг зохиомол Vice City хотын элементүүдийг бодитоор сэргээж байна. Тухайлбал, Tripping Animals Brewery GTA 6 дахь зохиомол ундаануудаас санаа авсан тусгай цуврал шар айраг гаргахаа зарлажээ.
Харин E11EVEN Miami шөнийн клуб нэг сарын хугацаанд тоглоомын ертөнц дэх NINE1NINE клуб болон хувирна. Мөн хөгжмийн Sweat Records дэлгүүр кампанит ажилд нэгдэж, GTA 6-д шинээр нэмэгдэх радио станцуудыг танилцуулахаар болжээ.
Grand Theft Auto VI тоглоомыг 11-р сарын 19-нд гаргахаар төлөвлөсөн байна.
