Архангай аймагт шүүхийн зориулалтаар шинээр барьсан дөрвөн давхар цогцолборыг ашиглалтад оруулжээ. Барилгын ажлыг 2025 оны тавдугаар сарын 11-нд эхлүүлсэн бөгөөд аймагт шүүх байгуулагдсаны 100 жилийн ойн өмнө нээлтээ хийсэн байна.
Шүүхийн ерөнхий зөвлөлийн мэдээлснээр уг барилга нь Монгол Улсад олон улсын стандартад нийцүүлэн төлөвлөсөн анхны шүүхийн цогцолбор юм. Нээлтийн ажиллагаанд шүүх, хууль зүй болон төрийн байгууллагын төлөөллүүд, Архангай аймгийн шүүхэд ажиллаж байсан үе үеийн шүүгч, захиргааны ажилтнууд оролцжээ.
Таван шүүх хурлын танхимтай
Шинэ цогцолбор нийт 3175 ам метр талбайтай, дөрвөн давхар бөгөөд шүүхийн үйл ажиллагаанд шаардлагатай өрөө, танхимуудыг нэг дор төвлөрүүлсэн байна. Тухайлбал таван шүүх хурлын танхим, 14 шүүгчийн өрөө, 14 шүүгчийн туслахын өрөө, Тамгын газрын ажилтнуудын есөн өрөө, хоёр сургалтын танхимтай аж.
Үүнээс гадна эвлэрүүлэн зуучлах хурлын өрөө, хүүхдийн өрөө, гэрч тусгаарлах болон түр саатуулах хэсэг, хэргийн материалтай танилцах зориулалтын өрөөнүүдийг төлөвлөжээ. Ийнхүү шүүх хурал болон иргэдэд үзүүлэх үйлчилгээний орчныг нэг дор шийдэхийг зорьсон байна.
Гэрч, хохирогчдыг тусдаа урсгалаар оруулахаар төлөвлөжээ
Барилгын архитектурын нэг онцлог нь шүүх ажиллагаанд оролцогчдын хөдөлгөөнийг тусгаарласан зохион байгуулалт гэж танилцуулжээ. Гэрч, хохирогчдыг шүүгдэгч болон бусад оролцогчтой нэг урсгалаар нэвтрүүлэхгүй байхаар тусдаа хаалга, хэсэг гаргасан байна.
Мөн гэрч тусгаарлах, түр саатуулах зориулалтын өрөөнүүд байгуулснаар аюулгүй байдлыг хангах болон оролцогчдыг сэтгэл зүйн дарамтаас хамгаалах нөхцөл бүрдэнэ гэж Шүүхийн ерөнхий зөвлөлийн зүгээс тайлбарлажээ.
Хүүхдэд зориулсан тусгай өрөө байгуулсан байна
Хүүхэд оролцсон хэрэг, маргааны үед ашиглах тусгай өрөөг мөн тохижуулжээ. Уг орон зайг хүүхдээс мэдүүлэг авах, уулзалт хийхдээ сэтгэл зүйн хувьд илүү тайван орчин бүрдүүлэх зорилгоор төлөвлөсөн байна.
Үүнээс гадна иргэний маргааныг эвлэрүүлэн зуучлахад зориулсан тусгай хурлын өрөө, шүүхийн ажилтнуудын сургалт зохион байгуулах хоёр танхимыг цогцолборт багтаажээ.
“Шүүхийн ирэх зуун жилийн хөгжлийн шинэ хуудсыг нээлээ” гэв
Шүүхийн ерөнхий зөвлөлийн дарга П.Золзаяа нээлтийн үеэр шүүхийн хараат бус ажиллагааг зөвхөн хууль эрх зүйн баталгаагаар бус, ажиллах орчин, дэд бүтцээр давхар хангах шаардлагатайг онцолжээ. Тэрбээр шинэ цогцолборыг Архангай аймгийн шүүхийн 100 жилийн ойтой холбон, “Шүүхийн ирэх зуун жилийн хөгжлийн шинэ хуудсыг нээлээ” хэмээн хэлсэн байна.
Хууль зүй, дотоод хэргийн сайд Г.Тэмүүлэн мөн шүүхийн барилга нь зөвхөн төрийн байгууллагын оффис бус, иргэд эрхээ хамгаалуулах орчин байх ёстой гэсэн байр суурь илэрхийлжээ.
