Нийслэлийн Сүхбаатар дүүргийн нэгдүгээр хорооны нутаг дэвсгэр, Энхтайвны гүүрний зүүн талд 23 давхар бүхий худалдаа, нийтийн үйлчилгээний иж бүрэн цогцолбор баригдахаар боллоо. Уг барилгыг тухайн байршилд газар эзэмших эрх бүхий “Мөнх ширээт ресорт” болон “Ньюфунт” компаниуд хамтран сүндэрлүүлж байгаа бөгөөд газар ашиглалтын зориулалтыг худалдаа, үйлчилгээний чиглэлээр албан ёсоор бүртгүүлсэн байна.
Нийслэлийн Хот төлөвлөлтийн мэргэжлийн зөвлөлөөс 2025 оны наймдугаар сард болсон хурлаараа тус хөрөнгө оруулагчдын барилга барих хүсэлтийг хэлэлцэн дэмжсэн юм. Улмаар шаардлагатай баримт бичиг болон төлөвлөлтийг хангуулснаар 2026 онд барилга угсралтын ажлыг эхлүүлэх албан ёсны зөвшөөрлийг олгосон байна. Замын чухал дэд бүтэцтэй нэн ойр байрлах тус цогцолбор нь тухайн бүсийн хот төлөвлөлт болон худалдаа, үйлчилгээний төвлөрөлд тодорхой нөлөө үзүүлэхээр байна.
