Холливудын алдартай жүжигчин Жонни Депп томоохон студиудын дэлгэцийн бүтээлд эргэн ирж, түүний гол дүрийг нь бүтээсэн “Day Drinker” хэмээх шинэ триллер киноны анхны трейлерийг “Lionsgate” компани олон нийтэд тохилуулав. “The Amazing Spider-Man”, “500 Days of Summer” кинонуудаараа алдаршсан найруулагч Марк Уэббийн удирдан чиглүүлсэн уг бүтээлд Жонни Деппээс гадна нэрт жүжигчин Пенелопа Крус болон Маделин Клайн нар хамтран тогложээ. Киноны үйл явдал хувийн завин дээр ажилладаг бармен бүсгүй нууцлаг зорчигчтой учирснаар эхэлж, улмаар гэмт хэргийн ертөнцийн нөлөө бүхий эмэгтэйтэй холбогдон, тэдний хэний ч төсөөлөөгүй далд холбоос илрэх тухай өгүүлдэг.
Дүрүүдийн онцлог болон киноны нээлтийн хуваарь
Киноны трейлерт Жонни Депп буурал үстэй, нууцлаг төрхтэйгөөр гарч ирэх бөгөөд гэмт хэрэг, өшөө авалт болон ер бусын нууцлаг элементүүдийг хослуулсан нь кино сонирхогчдын анхаарлыг татаж байна. Энэхүү “Day Drinker” кино нь 2027 оны гуравдугаар сарын 26-ны өдөр кино театруудаар нээлтээ хийхээр товлогджээ. Түүнчлэн Жонни Деппийн Холливудын томоохон студиудтэй хамтран ажилласан өөр нэгэн бүтээл болох “Paramount” компанийн “Ebenezer: A Christmas Carol” кинонд тэрээр Эбенезер Скружийн дүрийг бүтээсэн бөгөөд уг кино 2026 оны арваннэгдүгээр сарын 13-нд нээлтээ хийх юм.
