УИХ-ын гишүүн Д.Амарбаясгалан цаг үеийн улс төрийн нөхцөл байдлын талаар мэдээлэл хийх үеэрээ МАН-ын цөөнхийн гишүүд Ерөнхий сайд бөгөөд намын дарга Н.Учралтай уулзсан талаар мэдээллээ. Тэрээр үүсээд буй асуудлыг хөшигний цаана нэг, хоёр хүний хооронд шийдвэрлэх бус ил тод хэлэлцэх ёстой гэх байр суурийг илэрхийлж, Ерөнхий сайдтай биечлэн уулзсан байна.
Уулзалтын үеэр Л.Энх-Амгалан сайдыг олон нийтээс уучлал гуйх нь зүйтэй гэдэгт талууд санал нэгдсэн хэдий ч тэрээр өнөөдийг хүртэл уучлал гуйгаагүй байна. Иймээс МАН-ын цөөнхийн гишүүдийн зүгээс Л.Энх-Амгалан сайдыг албан тушаалаас нь огцруулах асуудлыг албан ёсоор тавихаар шийдвэрлэжээ. Уг шаардлагыг Ерөнхий сайдад хүргүүлж, энэ асуудлаар дахин уулзаж ярилцахаар төлөвлөөд байна.
