Америкийн жүжигчин Хайден Панеттьери 36 насандаа таалал төгссөн гэж ABC мэдээлжээ. Түүнийг “Heroes”, “Nashville” цувралууд болон “Scream 4”, “Scream 6” кинонуудаар нь олон нийт сайн мэддэг байв.
Жүжигчний төлөөлөгч түүний нас барсан мэдээллийг баталсан байна. Харин үхлийн шалтгааныг одоогоор зарлаагүй байгаа аж. Панеттьеригийн аав гэр бүл нь “энэ итгэмээргүй гарз хохирлыг даван туулж буй” энэ үед нас барсан нөхцөл байдлын талаар дэлгэрэнгүй мэдээлэл өгөхгүй байхыг хүсжээ.
“Heroes” цуврал түүнийг олонд таниулсан
Панеттьери 1994 онд, таван настайдаа кино урлагт хөл тавьжээ. Түүний анхны бүтээлүүдийн дунд “One Life to Live” болон “Guiding Light” зэрэг телевизийн төслүүд багтдаг.
Түүнийг өргөн олон таних болсон гол дүр нь NBC-ийн “Heroes” цувралын Клэр Беннет байв. Панеттьери 2006 онд тус цувралын жүжигчдийн бүрэлдэхүүнд нэгдэж, нийт 73 ангид тоглосон байна.
Мөн тэрээр “Nashville” цуврал болон “Scream 4”, “Scream 6” аймшгийн кинонуудад дүр бүтээж, олон арван кино, телевизийн бүтээлд оролцсон юм.
Кличкотой харилцаа болон хувийн тэмцэл
Хайден Панеттьери Украйны боксчин Владимир Кличкотой өмнө нь үерхэж, сүй тавьж байсан. Жүжигчин 2014 онд охиноо төрүүлсний дараа сэтгэл гутрал болон архины хамааралтай тэмцэж байсан тухайгаа нээлттэй ярьдаг байжээ.
Тэрээр “This Is Me: A Reckoning” буюу “Энэ бол би: Тооцоо” нэртэй дурсамж номдоо охиныхоо бүрэн асран хамгаалах эрхийг экс хамтрагч Владимир Кличкод шилжүүлэх шийдвэрийнхээ талаар бичсэн байна.
Амьдралынхаа сүүлийн жилүүдэд Панеттьери сэтгэцийн эрүүл мэнддээ идэвхтэй анхаарч, нөхөн сэргээх эмчилгээнд хамрагдан, уран бүтээлдээ эргэн орсон гэж мэдээлжээ.
