АҮЭБ-ийн сайд Г.Дамдинням ОХУ-ын Москва хотод ажиллаж, тус улсын Эрчим хүчний яам, “Роснефть”, “Газпром нефть” компанийн удирдлагуудтай шатахууны нийлүүлэлтийн асуудлаар уулзсан билээ. Тэрбээр өнөөдөр /2026.08.14/ өөрийн цахим хуудсаар дамжуулан хэлэлцээний эхний үр дүн гарч эхэлсэн талаар мэдээллээ.
Г.Дамдиннямын мэдээлснээр, сүүлийн 48 цагийн хугацаанд Монгол Улсын хилээр нийт 146 вагон буюу 8760 тонн АИ-92 автобензин орж ирсэн байна. Энэ нь манай улсын ердийн хэрэглээний 4-5 хоногийн хэрэглээтэй тэнцэх хэмжээ аж.
Мөн өнөөдөр дахин 42 вагон буюу 2520 тонн шатахуун орж ирж байгаа талаар тэрбээр мэдээлжээ. Үүнтэй холбоотойгоор шатахуун түгээх станцууд руу хангалт хийгдэж эхэлсэн бөгөөд хангамж хэвийн, тогтвортой байдалд шилжих хүлээлттэй байна.
Г.Дамдинням “ОХУ-аас буцаж явна. Яриа хэлэлцээний үр дүн эхнээсээ гарч сүүлийн 48 цагт манай улсад нийт 146 вагон буюу 8760 тонн АИ-92 улсын хилээр нэвтэрч орж ирсэн байна. Манай улсын ердийн хэрэглээний 4-5 хоногийн хэрэглээ юм. Араас нь өнөөдөр орж ирэх 42 вагон буюу 2520 тонн ирж явна. Өнөөдөр ШТС-ууд руу хангалтууд хийгдэж эхэлсэн. Хэвийн тогтвортой байдалд шилжих хүлээлттэй байна. Маргаашаас Улаанбаатарт түр хугацаагаар мөрдсөн 50 мянган төгрөгөнд, тэгш сондгойгоор шатахуун олгох, саванд өгөхгүй зэрэг зохицуулалтуудыг цуцална” хэмээлээ.
Шатахууны нийлүүлэлтийн талаарх гол мэдээлэл:
- Сүүлийн 48 цагт 146 вагон буюу 8760 тонн АИ-92 бензин орж ирсэн;
- Энэ нь ердийн хэрэглээний 4-5 хоногийн хэрэглээтэй тэнцэнэ;
- Өнөөдөр 42 вагон буюу 2520 тонн шатахуун нэмж ирж байна;
- ШТС-ууд руу хангалт хийгдэж эхэлсэн;
- Маргаашаас Улаанбаатарт мөрдсөн түр зохицуулалтуудыг цуцална.
Ингэснээр нийслэлд түр хугацаанд хэрэгжүүлж байсан нэг удаад 50 мянган төгрөгөөр цэнэглэх, автомашины улсын дугаарын тэгш, сондгойгоор шатахуун олгох, саванд шатахуун өгөхгүй байх зэрэг зохицуулалтыг маргаашаас зогсоохоор болжээ. Шатахууны хангалт нэмэгдэж эхэлснээр ойрын өдрүүдэд түгээлт хэвийн горимд шилжихээр байна.
