НҮБ-ын мэдээлснээр дэлхийн хэмжээнд залуучуудын ажилгүйдлийн түвшин өнгөрсөн онд өсжээ. Ялангуяа өндөр орлоготой орнуудад өсөлт илүү огцом ажиглагдсан бөгөөд энэ үед хиймэл оюун ухаан хөдөлмөрийн зах зээлийн бүтэц, ажлын байрны эрэлтийг өөрчилж эхэлсэн байна.
COVID-19 цар тахлын дараа залуучуудын хөдөлмөр эрхлэлтэд гарсан богино хугацааны сэргэлт саарч, зах зээл дахин зогсонги байдалд орсныг НҮБ-ын Хөдөлмөрийн асуудал хариуцсан байгууллага онцолжээ. Олон улсын хөдөлмөрийн байгууллага (ОУХБ)-ын мэдээллээр дэлхийн залуучуудын ажилгүйдлийн түвшин 2024 онд 12.3 хувь байсан бол өнгөрсөн онд 12.4 хувь болж нэмэгдсэн байна.
Энэ үзүүлэлт нь 15-24 насны 67 сая орчим залуу ажилгүй байгаатай дүйцэж байгаа юм. Мөн ажил эрхлээгүй, сургуульд сураагүй, мэргэжлийн сургалтад хамрагдаагүй залуусын эзлэх хувь бага зэрэг өсөж, 20 хувьд хүрсэн нь 257 сая гаруй залууст хамаарч байна гэж ОУХБ 2026 оны “Залуучуудын хөдөлмөр эрхлэлтийн дэлхийн чиг хандлага” тайландаа дурджээ.
Тайлангийн гол үзүүлэлтүүд:
- Дэлхийн залуучуудын ажилгүйдэл 12.4 хувьд хүрсэн;
- 15-24 насны 67 сая орчим залуу ажилгүй байна;
- Ажилгүй, суралцаагүй, сургалтад хамрагдаагүй залуусын хувь 20 хувь болсон;
- Энэ нь 257 сая гаруй залууст хамаарч байна;
- 2026, 2027 онд ажилгүйдлийн түвшин 12.3 хувь орчимд тогтвортой байх төлөвтэй.
ОУХБ-ын тайланд дурдсанаар, дэлхийн эдийн засгийн өсөлт саарч, шинээр бий болох ажлын байрны тоо цөөрч, геополитикийн зөрчил хурцдаж, технологийн өөрчлөлт хурдасч байгаа нь залуусыг сургуулиас хөдөлмөрийн зах зээлд шилжихэд улам хүндрэл учруулж байна. Ялангуяа зохистой, тогтвортой ажилтай болох боломж олон бүс нутагт хязгаарлагдмал болжээ.
Женев хотод төвтэй ОУХБ-ын тооцоогоор залуучуудын ажилгүйдлийн түвшин 2026, 2027 онд 12.3 хувь орчимд хадгалагдах төлөвтэй байна. Үүний зэрэгцээ хиймэл оюун ухаан хөдөлмөрийн зах зээлд хэрхэн нөлөөлөх нь тодорхойгүй хэвээр байгаа ч залуусын дунд ирээдүйдээ санаа зовних хандлага нэмэгдэж байгааг тайланд онцолсон байна.
Мөн залуус хөдөлмөрийн зах зээлд анх орж ирэхдээ түгээмэл сонгодог байсан оффис, захиргааны ажил, борлуулалт болон үйлдвэрлэлийн салбарын ажлын байр цөөрч байгааг анхааруулжээ. Энэ нь шинэ төгсөгчид болон ажлын туршлага багатай залууст илүү хүчтэй нөлөөлөх эрсдэлтэй байна.
Дэд бүс нутгийн түвшинд залуучуудын ажилгүйдэл хамгийн их өссөн бүсүүдэд Хойд Африк, Хойд Америк болон Хойд, Өмнөд, Баруун Европ багтжээ. Харин Төв болон Баруун Ази, Зүүн Европт залуучуудын ажилгүйдэл буурсан ч ажилгүй, сургууль болон сургалтад хамрагдаагүй залуусын тоо нэмэгдсэнээр уг эерэг үзүүлэлт саарсан байна.
Латин Америк болон Карибын бүс нутагт залуучуудын ажилгүйдэл, мөн ажилгүй, суралцаагүй залуусын үзүүлэлт хоёулаа буурсан ч энэ нь залуучуудын хүн амын тоо багассантай тодорхой хэмжээгээр холбоотой гэж тайланд дурджээ. Арабын орнууд болон Хойд Африк залуучуудын ажилгүйдлийн түвшнээр дэлхийд хамгийн өндөр хэвээр байгаа бөгөөд тус бүр 26.2 хувь, 22.6 хувьтай байна.
