“FIBA Asia Cup 2029” буюу Азийн сагсан бөмбөгийн аварга шалгаруулах тэмцээний урьдчилсан шатны эхний тойрог наймдугаар сарын 24-өөс есдүгээр сарын 1-ний хооронд зохион байгуулагдана. Улаанбаатар хот тус шатны хэсгийн тоглолтыг хүлээн авах дөрвөн хотын нэгээр сонгогдсон бөгөөд Монголын шигшээ баг D хэсэгт талбайдаа өрсөлдөх давуу талтай болж байна.
D хэсэгт Монгол, Тайланд, Вьетнам, Фижи улсын шигшээ багууд багтжээ. Тус хэсгийн багууд тойргийн журмаар хоорондоо тоглох бөгөөд Монголын шигшээ баг Азийн цомын эрхийн төлөөх эхний гурван тоглолтоо өөрийн талбайд хийх юм.
Урьдчилсан шатны эхний тойрогт нийт 18 улсын шигшээ баг оролцоно. Багууд дөрвөн хэсэгт хуваагдаж, Дубай, Атырау, Серембан, Улаанбаатар хотод өрсөлдөхөөр байна.
Хэсгүүдийн хуваарилалт:
- A хэсэг, Дубай: Бахрейн, АНЭУ, Кувейт, Оман, Непал
- B хэсэг, Атырау: Казахстан, Палестин, Шри Ланка, Мальдив, Кыргызстан
- C хэсэг, Серембан: Индонез, Малайз, Хонгконг, Хятад, Сингапур
- D хэсэг, Улаанбаатар: Монгол, Тайланд, Вьетнам, Фижи
Эхний шатнаас хэсэг тус бүрийн эхний гурван байр эзэлсэн баг дараагийн шатанд шалгарна. Ингэснээр нийт 12 баг хоёр хэсэгт хуваагдаж, тус бүр зургаан багтайгаар өрсөлдөх юм.
Хоёрдугаар шатны тоглолтуудыг 2026 оны арваннэгдүгээр сарын 23-аас арванхоёрдугаар сарын 1-ний хооронд зохион байгуулахаар төлөвлөжээ. Энэ шатны хоёр хэсгээс тус бүр эхний дөрвөн байр эзэлсэн нийт найман баг “FIBA Asia Cup 2029” тэмцээний урьдчилсан шатны эрхээ авах юм.
Дараагийн шатанд шалгарсан багууд 2025 оны Азийн цомд оролцсон 16 багтай нэгдэж, 2029 оны Азийн цомын эрхийн төлөөх үндсэн сонгон шалгаруулалтад өрсөлдөнө. Иймээс Монголын шигшээ багийн хувьд Тайланд, Вьетнам, Фижигийн эсрэг хийх талбайн тоглолтууд хэсгээс гарах гол боломж болохоор байна.
