Аж үйлдвэр, эрдэс баялгийн яамнаас шатахууны нийлүүлэлтийн цаг үеийн асуудлаар өнөөдөр (2026.08.07) хэвлэлийн хурал хийлээ. Тус яамны Төрийн нарийн бичгийн дарга Б.Дашпүрэвийн мэдээлснээр, шатахуун түгээх станцуудад нэг тээврийн хэрэгсэлд олгож буй 50 мянган төгрөгийн хязгаарлалтыг 100 мянган төгрөг болгон нэмэгдүүлэх боломжийг судалж байгаа бөгөөд маргаашнаас хэрэгжиж эхлэх магадлалтайг онцолсон юм.
БНХАУ болон ОХУ-аас авах импортын татан авалт
Импортын нийлүүлэлтийг тасалдуулахгүй байх хүрээнд БНХАУ-аас 3,000 тонн дизель түлш импортлох зөвшөөрөл авснаас 1,000 тонн нь Улаанбаатар хотод орж ирээд байна. Үлдсэн 2,000 тонн дизель түлшийг Замын-Үүдэд шилжүүлэн ачиж байгаа бөгөөд үүний дараа 6,000 тонн автобензин нийлүүлэгдэхэд бэлэн болжээ.
Мөн ОХУ-аас наймдугаар сард авах бүтээгдэхүүний хэмжээг баталгаажуулсан бөгөөд ачилтыг нэмэгдүүлэх, цаашдын хамтын ажиллагааг зөвлөлдөхөөр АҮЭБ-ийн сайд Г.Дамдинням маргааш Москва хотыг зорихоор боллоо.
ШТС-уудын ачаалал ба бодит мэдээллийн систем
Иргэдийг бодит мэдээллээр хангах, ШТС-уудын очер дарааллыг тодорхой болгох үүднээс Татварын бүртгэлийн систем болон e-Mongolia-тай хамтран тусгай аппликейшн хөгжүүлж байгааг дуулгав.
Одоогоор Тасганы овоо, Энхтайваны гүүр болон Нарны замын дагуух байршлуудад ачаалал хамгийн өндөр байгаа бөгөөд бусад дүүрэгт харьцангуй тайван байна. Тухайлбал, өнгөрсөн хоногийн мэдээллээр Сүхбаатар дүүрэгт 11 мянган тээврийн хэрэгсэл шатахуун авсан бол Баянгол дүүрэгт 3 мянган тээврийн хэрэгсэл үйлчлүүлжээ.
