“Дэлхийн хамгийн үзэсгэлэнтэй охин” хэмээн багаасаа нэрлэгдэж ирсэн Францын модель Тилан Блондо дижей Бен Атталатай хуримаа хийжээ. Тэрээр баярын мөчүүдийнхээ зургуудыг Instagram хуудсандаа нийтэлсэн байна.
Хосын хурим Францын өмнөд хэсэгт байрлах шилтгээнд болсон аж. Сүйт бүсгүй цагаан торон материалтай, урт гивлүүртэй Miu Miu брэндийн даашинз сонгосон бол Бен Аттала хар өнгийн сонгодог хослол, цагаан цамц, эрвээхэй зангиатай иржээ.
Ёслол задгай талбайд болжээ
Тилан Блондогийн нийтэлсэн зургууд болон бичлэгээс харахад хуримын ёслол задгай агаарт болсон байна. Зочид амьд хөгжмийн дор бүжиглэж, хосын баярыг хамт тэмдэглэжээ.
Тансаг шилтгээн, сонгодог хувцаслалт, романтик уур амьсгал нь ёслолыг үлгэрийн мэт харагдуулсан бөгөөд модель бүсгүйн шүтэн бишрэгчид түүнд баяр хүргэсэн сэтгэгдэл олноор үлдээсэн байна.
Тилан Блондогийн загварын замнал
Тилан бол Францын хөлбөмбөгчин Патрик Блондо болон телевизийн хөтлөгч Вероника Лубри нарын охин юм. Тэрээр дөнгөж дөрвөн настайдаа Jean Paul Gaultier-ийн загварын шоунд оролцож, модель болох гараагаа эхлүүлжээ.
10 настайдаа Vogue Enfants сэтгүүлд зураг авхуулсны дараа хэвлэлүүд түүнийг “дэлхийн хамгийн үзэсгэлэнтэй охин” хэмээн нэрлэх болсон байна. Дараа нь тэр Dolce&Gabbana, L’Oreal Paris зэрэг алдартай брэндүүдтэй хамтран ажиллаж, Heaven May нэртэй өөрийн хувцасны брэндийг гаргасан юм.
2018 онд Тилан Блондо олон улсын “100 хамгийн үзэсгэлэнтэй царай” жагсаалтад багтаж, загварын ертөнц дэх байр сууриа улам бататгасан байна.
