Японы Кюсю арал дахь Кумамото мужид болсон хүчтэй газар хөдлөлтийн улмаас амиа алдсан хүний тоо 28-д хүрсэн байна. Энэ талаар Засгийн газрын Ерөнхий нарийн бичгийн дарга Минору Кихара Токиод хийсэн хэвлэлийн хурлын үеэр мэдэгджээ.
Түүний хэлснээр, энэ тоонд газар хөдлөлтийн үр дагавартай холбоотой байж болзошгүй нас баралтууд мөн багтсан байна.
Олон айл өрх ус, цахилгаан, хийгүй үлджээ
Газар хөдлөлтийн дараа олон байшин цахилгаан, ус, хий хангамжгүй болсон байна. Зарим бүсэд орон сууц нурж, зам, гүүр эвдэрчээ.
Гамшгийн хор уршгийг арилгахад Японы Өөрийгөө хамгаалах хүчний 4.6 мянга орчим алба хаагч оролцож байна.
Кумамото мужид 95 мянга гаруй байшин, орон сууц усан хангамжгүй хэвээр байгаа аж. Харин хөрш Нагасаки мужид усны хангамж бүрэн сэргэсэн гэж Японы Газрын харилцаа, дэд бүтэц, тээвэр, аялал жуулчлалын яамны албан мэдээнд дурджээ. Гамшгийн бүсэд ус автоцистернээр хүргэж байгаа бөгөөд үүнд зэвсэгт хүчний нэгжүүд ч оролцож байна.
Дүрвэгсдийн 415 цэг байгуулсан байна
Орон нутгийн эрх баригчдын мэдээлснээр, Кумамотод 64 эмнэлгийн байгууллага цахилгаан, усгүй байна. Мөн 415 түр байрлах цэг байгуулж, тэнд 14 мянга гаруй хүнийг байрлуулжээ.
Иргэдийг гол төлөв сургуулийн спорт заал болон бусад олон нийтийн байгууламжид байрлуулсан байна. Гэвч олон газарт агааржуулагч байхгүй тул халуун цаг агаарт олноороо халуунд цохиулах эрсдэл нэмэгдэж байна. Цаг уурчдын таамгаар гамшгийн бүсэд агаарын температур 40 хэм хүрч болзошгүй аж.
7.1 магнитудын хүчтэй газар хөдлөлт нь Японд сүүлийн жилүүдэд болсон хамгийн хүчтэй чичирхийллүүдийн нэг гэж үнэлэгдэж байна.
