АНУ-ын Үндэсний сагсан бөмбөгийн холбооны (NBA) 2026 оны драфтын сунгаа албан ёсоор өндөрлөж, Монголын сагсан бөмбөгийн хорхойтнуудын чих тавин хүлээсэн сонголтууд тодорлоо. Энэ удаагийн драфтад эх орноо төлөөлөн нэрээ албан ёсоор дэвшүүлсэн Ш.Энхийн-Од багуудын албан ёсны сонголт дунд багтаж чадаагүй байна. Хоёрдугаар тойрогт нэрээ сонсгох өндөр магадлалтай хэмээн таамаглаж байсан хөгжөөн дэмжигчдийн хүлээлт ийнхүү биелээгүй ч түүний дэлхийн шилдэг лигт хөл тавих тэмүүлэл үүгээр зогсоогүй юм.
Драфтын үр дүн тодорхой болсны дараа түүний аав, Монгол Улсын Гавьяат тамирчин Ц.Шаравжамц өөрийн цахим хуудсаараа дамжуулан элэг нэгтнүүддээ хандан сэтгэгдлээ хуваалцжээ. Тэрбээр “Зүгээр ээ, монголчууд аа. Одоо зуны лигийн багаа сонгоно, боломж байгаа. Анхаарал хандуулж, сэтгэлээ зориулсан та бүхэндээ баярлалаа” хэмээн бичиж, хүүгийнх нь карьерын дараагийн алхмууд нээлттэй байгааг сануулсан юм.
Ш.Энхийн-Одын хувьд АНУ-ын их сургуулийн лиг (NCAA)-т тоглож чамгүй туршлага хуримтлуулсан бөгөөд 2 метр өндөртэй холбон тоглогч гэдгээрээ бие бялдар, ур чадварын хувьд NBA-ийн түвшинд өрсөлдөх бүрэн боломжтойг мэргэжилтнүүд онцолдог. Тэрбээр драфтын сорилтын хүрээнд дэлхийн хамгийн шилдэг таван багийн бэлтгэл базаах баазад уригдан, өөрийгөө сорьсон билээ. Тухайлбал, тэрбээр дараах багуудын тусгайлсан бэлтгэлд хамрагдаад байсан юм:
- Лос-Анжелес Лэйкерс
- Милуоки Бакс
- Орландо Мэжик
- Даллас Маверикс
- Мемфис Гриззлис
Драфтад сонгогдож чадаагүй нь түүний NBA-д тоглох мөрөөдөл бүрэн дууссан гэсэн үг биш бөгөөд сагсан бөмбөгчид урилгаар лигт багтах өөр нэгэн чухал хаалга нээгддэг. Түүний дараагийн гол сорилт бол ирэх долдугаар сарын 9-нд Лас-Вегас хотноо хөшгөө нээх NBA-ийн Зуны лиг (Summer League) байх болно. Хэрэв Ш.Энхийн-Од тус лигт аль нэгэн багийн бүрэлдэхүүнд багтан амжилттай тоглож, багуудын удирдлагын анхаарлыг татаж чадвал үндсэн гэрээ байгуулах боломж хэвээр үлдэнэ.
Ерөнхийдөө NBA-ийн драфт (NBA Draft) гэдэг нь тус лигийн багууд жил бүр шинээр тоглох эрх нь нээгдсэн залуу авьяастнуудыг өөрсдийн бүрэлдэхүүндээ хуваарилан авдаг хамгийн том үйл ажиллагаа юм. Уг сонголт нь нийт хоёр тойргоос бүрдэх бөгөөд баг бүр тойрог тус бүрт 1-1 сонголт хийх эрхтэйгээр нийт 60 тоглогчийг шалгаруулж авдаг дүрэмтэй. Хэдийгээр драфтад нэр дэвшигчдийн дийлэнх нь АНУ-ын их сургуулиудын (NCAA) лигээс ирдэг ч Европын болон бусад улс орны мэргэжлийн лигийн шилдгүүдэд ч энэхүү үүд хаалга үргэлж нээлттэй байдаг билээ.
