Монгол Улсын Ерөнхийлөгчийн ивээл дор хэрэгжиж буй “Тэрбум мод” үндэсний хөдөлгөөнийг Биеийн тамир, спортын улсын хороо (БТСУХ) болон Үндэсний шигшээ багийн тамирчид идэвхтэй дэмжлээ. Өнгөрсөн долоо хоногт спортын салбарын төлөөллүүд Налайх дүүргийг зорьж, “Шинэ Налайх” цэцэрлэгт хүрээлэнд мод тарих, услах ажлыг нэгдсэн зохион байгуулалттайгаар гүйцэтгэсэн юм.
Байгаль дэлхийгээ нөхөн сэргээх, ногоон байгууламжийг нэмэгдүүлэх үйлсэд спортынхон жил бүрийн тав болон аравдугаар сард уламжлал болгон оролцдог бөгөөд тэдний тарьсан суулгацууд өдгөө залуу төгөл болон ургаж, бодит үр дүнгээ өгч байна. Энэ удаагийн экологийн арга хэмжээнд БТСУХ-ны 22 албан хаагч, Үндэсний шигшээ багийн 52 тамирчин оролцож, дараах төрлийн моддыг суулгалаа:
- Миндаль (Бүйлс): 120 ширхэг
- Хайлаас: 8,000 ширхэг
Ийнхүү биеийн тамир, спортын салбарынхан эх орноо ойжуулах, уур амьсгалын өөрчлөлтийн эсрэг тэмцэх үйлсэд манлайлан оролцож, нийт ард иргэдийг байгаль хамгаалах ажилд идэвхтэй нэгдэхийг уриалав.
