“Цус сорогчийн өдрийн тэмдэглэл” (The Vampire Diaries) цувралын од, нэрт жүжигчин Йен Сомерхолдер олон сая долларын өрнөөс гарахын тулд бүх хөрөнгө хуудсаа зарахад хүрчээ.
Холливудад өндөр амжилт гаргасны дараа тэрээр амьдралынхаа хэв маягийг эрс өөрчилж, кино зураг авалтаас түр хөндийрөн бизнесийн салбарт хөл тавьсан юм. Гэвч энэхүү шинэ алхам нь телевизийн салбар шиг тогтвортой байсангүй. Тэрээр эхнэрийн хамт санхүүгийн ноцтой хүндрэлтэй тулгарчээ. Менежментийн алдаа болон бусад хүчин зүйлс нөлөөлж, тэдний гэр бүл маш хүнд нөхцөл байдалд орсон байна.
“Би бизнесийн салбарт буруу хөл тавьснаас үүдэлтэй санхүүгийн хямралын улмаас маш их ашигтай байсан телевизийн карьераа орхисон. Залилан мэхлэлтээс болж эхнэр бид хоёр найман оронтой тоогоор хэмжигдэх их хэмжээний өрөнд унасан юм. Ийм гүнзгий ангалаас гарна гэдэг туйлын хэцүү. Гэхдээ бид Никкигийн хамт үүнийг давж чадсан” гэж жүжигчин “E! News“-т өгсөн ярилцлагадаа дурджээ.
Түүний хэлснээр, хямралыг даван туулахад эхнэр нь гол үүрэг гүйцэтгэсэн байна. Никки нөхцөл байдлыг тогтворжуулахын тулд хүнд шийдвэрүүдийг гаргахад нь тусалж, хосууд үл хөдлөх хөрөнгө болон хувийн үнэ цэнтэй зүйлсээ зарж эхэлжээ. “Тэр л биднийг энэ бүхнээс сугалж гаргасан. Бид байшин, уран зураг, машин, цаг гээд бүх зүйлээ зарсан” хэмээн Сомерхолдер ярьсан юм.
Жүжигчин өнөөдөр өөрийн гаргасан шийдвэрүүдийг эргэн харж, алдаагаа хүлээн зөвшөөрч байна. Нэр хүндийнхээ оргил үед илүү болгоомжтой байж болох байсныг тэрээр тэмдэглэжээ. “Би дэлхийн хамгийн том шоунуудын нэгээс тэтгэвэртээ гарсан шигээ чимээгүй суух байсан юм. Хэзээ ч ашиг өгөхгүй компаниуд байгуулахын оронд шүү дээ” хэмээн тэрээр нэмж хэлэв.
