Дөрөвдүгээр сарын 25-ны өдөр Вашингтон хотноо зэвсэгт халдлага үйлдсэн этгээд хэргийн өмнө “тунхаг бичиг” үйлдэж, түүндээ АНУ-ын засаг захиргааны ажилтнуудыг гол бай болгохоо тэмдэглэсэн байжээ. Мөн тэрээр АНУ-ын Ерөнхийлөгч Дональд Трампын бодлогыг эрс эсэргүүцэгч байсан нь тогтоогдоод байна.
Энэ талаар Fox News сувгийн сэтгүүлч Жеки Хайнрик мэдээллээ. “Сэжигтний бичсэн тунхаг бичигт тэрээр засаг захиргааны албан тушаалтнуудыг онилсон болохоо тодорхой дурдсан байна. Түүний олон нийтийн сүлжээний хуудсуудад Дональд Трамп болон Христэд итгэгчдийн эсрэг чиглэсэн агуулга бүхий мэдээллүүд олноор байжээ” хэмээн сэтгүүлч X (хуучнаар Twitter) хуудсандаа бичжээ.
Сэжигтэн уг бичвэрээ гэр бүлийнхэн рүүгээ илгээсэн бөгөөд ах нь халдлага гарахаас өмнө цагдаагийнханд уг тэмдэглэлийг үзүүлж амжсан байна. Үүнээс гадна халдлага үйлдэгч этгээд өмнө нь Дональд Трампын бодлогыг эсэргүүцсэн “No Kings” (“Хаад үгүй”) уриатай жагсаалд оролцож байсныг Хайнрик онцолжээ.
Дөрөвдүгээр сарын 25-ны орой Вашингтон дахь “Washington Hilton” зочид буудалд Цагаан ордны сурвалжлагчдын холбооны хүлээн авалтын үеэр буун дуу гарсан юм. Тухайн үед Ерөнхийлөгч Дональд Трамп арга хэмжээнд байлцаж байсан бөгөөд Коул Томас Аллен гэх сэжигтнийг хэргийн газар дээр нь баривчилжээ. Ерөнхийлөгч халдлагын үеэр гэмтэж бэртээгүй байна. Хэрэг гарснаас цаг орчмын дараа Дональд Трамп хэвлэлийн бага хурал хийж, болсон явдлын талаар ярихдаа буун дууг “тавиур унахтай адил” сонсогдсон хэмээн зүйрлэсэн байна.
