Улаанбаатар хотын авто замын түгжрэлийг сааруулах зорилготой 1.5 их наядын төсөвтэй трамвайн хоёрдугаар шугамын тендерийг нээх хугацааг сунгасан байна. Архивын ерөнхий газраас Сүхбаатарын талбай чиглэлд тавигдах уг шугамын гүйцэтгэгчийг сонгох тендерийг EPC буюу “Зураг төсөл боловсруулах, худалдан авалт хийх, барилга угсралт гүйцэтгэх” нөхцөлөөр 2026 оны гуравдугаар сарын 13-ны өдөр зарласан юм.
Анхны товоор тендерийг дөрөвдүгээр сарын 29-нд нээхээр төлөвлөж байсан ч оролцогч талуудын гаргасан хүсэлтийг үндэслэн Тендерийн үнэлгээний хороо ирэх тавдугаар сарын 13-ны өдөр хүртэл сунгах шийдвэр гаргажээ.
Төслийн үр өгөөж болон байгаль орчны үнэлгээ
Уг төслийн байгаль орчны нарийвчилсан үнэлгээг Байгаль орчин, уур амьсгалын өөрчлөлтийн яамны Мэргэжлийн зөвлөлөөс 2026 оны хоёрдугаар сарын 23-ны өдөр хэлэлцэж, албан ёсоор дэмжсэн байна. Төслийн хоёрдугаар шугам ашиглалтад орсноор хотын тээвэр, экологийн нөхцөл байдалд дараах эерэг өөрчлөлтүүд гарна гэж тооцоолжээ:
- Зорчих хугацаа: Одоогийн байдлаар автобусаар 90-100 минут зарцуулдаг замыг трамвайгаар ердөө 35-40 минутад туулах боломж бүрдэнэ.
- Тээвэрлэлтийн чадамж: Оргил ачааллын үед цагт 6,989 хүртэлх зорчигчийг тээвэрлэж, замын ачааллыг 12.2 хувиар бууруулна.
- Экологийн үр ашиг: Агаарын бохирдолд сөргөөр нөлөөлдөг нүүрсхүчлийн хийн ялгарлыг жилд 43.3 тонноор, азотын ислийг 301.9 тонноор тус тус багасгах юм.
Төслийн эхний шугамыг зуслангийн бүсээс төв талбай хүртэлх чиглэлд хэрэгжүүлэхээр төлөвлөн ажиллаж байна.
