Нийслэлийн Баянзүрх дүүргийн 35 дугаар хороонд амьдардаг айл руу баавгай дайрч, нэг иргэний амь нас хохирсон ноцтой хэрэг гарсан талаар Цагдаагийн ерөнхий газраас мэдээллээ. Хэрэг энэ сарын 07-ноос 08-нд шилжих шөнийн 01:00 цагийн орчимд Улиастайн бурхантын аманд болсон байна.
Хэргийн нөхцөл байдал ба хохирогчид
Тус газарт мал маллан амьдардаг 40 настай эмэгтэй, 55 настай эрэгтэй нар гэртээ амарч байх үед баавгай халджээ. Эмэгтэй нь нүүрэндээ самардуулсан шархтайгаар гэрээсээ зугтан гарч чадсанаар амьд үлдсэн бөгөөд одоогоор эмнэлгийн тусламж авч байгаа аж.
Харин баавгайд бариулсан 55 настай эрэгтэйн цогцсыг гэрээс нь тодорхой зайд байхад нь олж тогтоожээ. Мөн Цагдаагийн байгууллагаас хэрэг явдалтай холбогдуулан бага насны хүүхэд өртсөн гэх мэдээллийг ор үндэслэлгүй болохыг тодотголоо.
Эрэн хайх ажиллагаа үргэлжилж байна
Одоогоор аюул тарьсан баавгайг олон аюулгүй болгохоор Нийслэлийн байгаль орчны газар болон Баянзүрх дүүргийн цагдаагийн газрын алба хаагчид хамтран эрэн хайх ажиллагааг зохион байгуулж байна.
Дашрамд дурдахад, Нийслэлийн байгаль орчны газарт он гарснаас хойш зэрлэг амьтантай холбоотой 597 удаагийн мэдээлэл бүртгэгдэж, тухай бүр шаардлагатай арга хэмжээнүүдийг авч ажиллажээ.
