Шинэ Зеландын нийслэл Веллингтонд 15 жилийн дараа анх удаа цас орсон байна. The Guardian-ийн мэдээлснээр, 8-р сарын 4-нд Хойд болон Өмнөд аралд цас орж, Крайстчерч, Данидин зэрэг хотууд ч цасан бүрхүүлтэй болжээ.
Өмнөд арал дахь гурван цаг уурын станцад агаарын температур -9 хэм хүртэл буурсан байна.
Зам хаагдаж, сургуулиуд хичээлээ цуцлав
Цас, мөстөлтийн улмаас Шинэ Зеландад хэд хэдэн замыг хаажээ. Мөн олон сургууль хичээлээ цуцалсан байна.
Цагдаагийн мэдээлснээр, мөс, цаснаас болж автомашинууд замын хажуу руу гарсан олон тохиолдол бүртгэгджээ. Үүнтэй холбоотойгоор иргэдийг шаардлагагүй бол замд гарахгүй байхыг уриалсан байна.
Иргэд гудамжинд цана, сноубордтой гулгажээ
Сошиал сүлжээнд хүмүүс хотын гудамжаар цана, сноубордтой гулгаж буй зураг, бичлэгүүд тархжээ. Тухайлбал, Данидин хотын Болдуин-стритээр нэгэн цаначин гулгасан бичлэг нийтлэгдсэн байна.
Болдуин-стрит нь дэлхийн хамгийн огцом налуутай гудамж хэмээн Гиннесийн амжилтын номд бүртгэгдсэнээрээ алдартай юм.
