Улсын Их Хурлын дарга С.Бямбацогт өнөөдөр Япон Улсын Парламентын Зөвлөхүүдийн танхимын дэд дарга Фүкүяма Тэцүрог хүлээн авч уулзлаа. Уулзалтаар хоёр улсын парламентын харилцаа, худалдаа, эдийн засгийн хамтын ажиллагаа, хөрөнгө оруулалт, хууль тогтоох үйл ажиллагаанд технологи ашиглах зэрэг өргөн хүрээний асуудлыг хэлэлцсэн байна.
С.Бямбацогт уулзалтын эхэнд Япон Улсыг ардчиллын нийтлэг үнэт зүйлстэй, Монгол Улсын “гуравдагч хөрш”, Тусгай стратегийн дотно түнш гэдгийг онцолжээ. Японтой найрсаг харилцаа, хамтын ажиллагааг гүнзгийрүүлэх нь Монгол Улсын гадаад бодлогын тэргүүлэх чиглэлийн нэг бөгөөд УИХ энэ харилцаанд өндөр ач холбогдол өгдөг гэдгийг тэрбээр тэмдэглэсэн байна.
УИХ-ын дарга мөн Монголын парламентын гишүүдийн дунд Япон Улсад боловсрол эзэмшсэн гишүүд олон байдгийг дурдлаа. Тэдгээр гишүүд мэдлэг, туршлагаас гадна ёс зүйн хувьд манлайлал үзүүлж байгаад сэтгэл хангалуун байдгаа илэрхийлжээ.
Уулзалтын үеэр хөндсөн гол сэдвүүд:
- хоёр улсын худалдаа, эдийн засгийн харилцааг өргөжүүлэх;
- парламент хоорондын хамтын ажиллагааг тогтмолжуулах;
- хууль тогтоох үйл ажиллагаанд хиймэл оюуны дэвшлийг ашиглах;
- хуурамч мэдээ, мэдээлэлтэй тэмцэх эрх зүйн орчны талаар туршлага солилцох;
- гадаадын хөрөнгө оруулалтыг дэмжих, хамгаалах бодлогын талаар ярилцах.
С.Бямбацогт Япон улсын Засгийн газраас Хөгжлийн албан ёсны тусламжийн иений хөнгөлөлттэй зээлийн хүрээнд “Чингис хаан” олон улсын нисэх онгоцны буудлыг өргөтгөх, хүчин чадлыг нэмэгдүүлэх асуудлыг хэрэгжүүлэхээр ажиллаж буйд ач холбогдол өгч буйгаа тодотгожээ. Мөн Монгол Улсын Их Хурлаас гадаадын хөрөнгө оруулалтыг дэмжих, эрх ашгийг нь хамгаалах асуудлыг бодлогын төвдөө авч үзэж, шаардлагатай хууль, эрх зүйн орчныг бүрдүүлээд байгааг онцолсон байна.
Худалдааны харилцааны тухайд талууд 2015 онд байгуулсан чөлөөт худалдааны хэлэлцээрийн хэрэгжилтийг хөндсөн байна. Уг хэлэлцээрээр Монгол Улсын 5700 бараа бүтээгдэхүүн Японы зах зээлд татваргүй гарах боломж бүрдсэн ч тодорхой саад бэрхшээл байсаар, Монголын экспорт 2015 оны түвшнээс буурсан асуудлыг УИХ-ын дарга дурджээ.
Тиймээс гадаад худалдааны тэнцвэрийг сайжруулахад хоёр талын хамтын оролцоо, идэвхтэй хүчин чармайлт шаардлагатай гэж үзсэн байна. Парламент хоорондын тогтмол солилцоо нь зөвхөн хууль тогтоох туршлага хуваалцахаас гадна ардчиллын үнэт зүйлсийг бэхжүүлэх, хоёр улсын найрсаг харилцааг улам өргөжүүлэх ач холбогдолтойг талууд тэмдэглэжээ.
Япон Улсын Парламентын Зөвлөхүүдийн танхимын дэд дарга Фүкүяма Тэцүро 2025 онд Япон улсын Цог Жавхлант Эзэн Хаан, Эрхэм дээд Хатан нар Монгол Улсад анх удаа төрийн айлчлал хийх үеэр халуун дотноор хүлээн авсан Монголын ард түмэнд талархал илэрхийлсэн байна. Тэрбээр Япон, Монголын хамтын ажиллагааг гүнзгийрүүлэх нь бүс нутгийн аюулгүй байдалд чухал ач холбогдолтой гэж үзэж буйгаа хэлжээ.
Мөн хоёр улсын хамтын ажиллагааг бүх салбарт хөгжүүлэхэд хүчин чармайлт гарган ажиллахаа илэрхийлсэн байна. Тэрбээр 2027 онд тохиох Монгол, Япон хоёр улсын хооронд дипломат харилцаа тогтоосны 55 жилийн ойг угтан дараагийн 50 жилийн харилцааг шинэ шатанд гаргах яриа хэлэлцээ энэ уулзалтаар эхэлж байна гэж үзэж буйгаа уулзалтын төгсгөлд онцоллоо.
