Грэммийн шагналт дуучин Майли Сайрус өөрийн бие даасан 10 дахь студийн “Bass Persuades” цомгоороо АНУ-ын цомгийн гол жагсаалт болох “Billboard 200” чартыг тэргүүлээд байна. Энэ нь түүний хувьд 2013 оны алдартай “Bangerz” цомгоос нь хойш даруй 13 жилийн дараа тус чартын оройд эргэн заларсан түүхэн амжилт болж байгаа юм.
Есдүгээр сарын 18-нд нээлтээ хийсэн тус цомог эхний долоо хоногтоо АНУ-ын зах зээлд цомогтой адилтгах 61,000 нэгж борлуулагдсан (үүний 47,000 нь цэвэр цомгийн борлуулалт) үзүүлэлтээр чартыг шууд тэргүүлжээ.
Тус чартын өрсөлдөөн маш ойролцоо оноогоор өрнөсөн бөгөөд дуучин Элла Лэнглигийн “Dandelion” цомог (61,000 орчим нэгж) болон Райли Грийний “That’s Just Me” цомог (60,000 нэгж) маш бага зөрүүтэйгээр удаалсан байна.
“MILEY” нэрээр эхлүүлсэн шинэ эрин үе
Дуучин бүсгүй энэ удаагийн шинэ цомгоо өөрийн овгийг хасаж, зөвхөн “MILEY” гэх нэрээр сурталчилж буй бөгөөд уран бүтээлдээ 1980-аад оны синт-поп болон дэнс хөгжмийн хэв маягийг шингээжээ.
Энэхүү амжилт нь түүний карьер дахь “Billboard 200” чартыг тэргүүлсэн 6 дахь цомог болж байгаа бол шилдэг 10-т багтсан 16 дахь бүтээлээр нь бүртгэгдэж байна.
