Сингапурын найруулагч Нельсон Ёогийн шинэ бүтээл “The House on the Moon” бүрэн хэмжээний уран сайхны киноны анхны хэсгийг олон нийтэд албан ёсоор толилууллаа. Тус бүтээл нь ирэх наймдугаар сард Швейцар улсад зохион байгуулагдах 79 дэх удаагийн Локарногийн олон улсын кино наадамд дэлхийн нээлтээ хийж, наадмын дээд шагнал болох “Алтан Ирвэс” (Golden Leopard)-ийн төлөө өрсөлдөхөөр шалгарсан юм.
Хятадын домог ба орчин үеийн шинжлэх ухааны уран зөгнөл
“The House on the Moon” нь Сингапурын кино урлагийн түүхэнд анх удаа Хятадын тулаант, баатарлаг уран зөгнөлт буюу “wuxia” (уся) жанраар бүтээгдсэнээрээ онцлогтой. Киноны зохиолд Хятадын алдартай домог болох Сарны дагина Чан Э, мэргэн харваач Хоу И нарын түүхийг орчин үеийн шинжлэх ухааны уран зөгнөлтэй хослуулан цоо шинэ өнцгөөс харуулжээ. Түүнчлэн Сингапурт виртуал продакшн (Virtual Production) технологийг ашиглан бүтээсэн анхны бүрэн хэмжээний кино болж байгаа юм.
Бага насны мөрөөдөл ба олон улсын жүжигчдийн бүрэлдэхүүн
Найруулагч Нельсон Ёо “Variety” сэтгүүлд өгсөн ярилцлагадаа жанрын хязгаарлалтад баригдалгүй, уся киноны хэв маягийг зоригтойгоор ашигласан бөгөөд энэ нь түүний бага насны мөрөөдлийг кино хэлээр биелүүлэх боломж болсныг онцолсон байна.
Киноны гол дүрийг Сингапурын жүжигчин Лим Шиан бүтээсэн бөгөөд Тайванийн нэрт жүжигчин Ли Каншэн болон Акира Хуан, Доминик Рустам зэрэг олон улсын жүжигчид хамтран тогложээ.
