Орхон аймгийн Эрдэнэт хотын түүхт 50 жилийн ойн хүрээнд зохион байгуулагдаж буй “Мастерс” ангиллын хоккейн улсын аварга шалгаруулах тэмцээн өнөөдөр буюу 2026 оны нэгдүгээр сарын 30-ны өдөр албан ёсоор эхэлж байна. 50-иас дээш насны ахмад тамирчид хурд хүч, ур чадвараа сорих уг тэмцээн Эрдэнэт хотын Орос сургуулийн мөсөн талбайд болж байна.
Тус тэмцээнийг Орхон аймгийн Засаг даргын нэрэмжит болгон зохион байгуулж байгаа бөгөөд дараах байгууллагууд хамтран ажиллаж байна:
- Ерөнхий ивээн тэтгэгч: Орхон аймгийн Засаг даргын Тамгын газар.
- Зохион байгуулагчид: Монголын хоккейн холбоо, Орхон аймгийн Биеийн тамир спортын хороо.
- Дэмжигч байгууллагууд: “Эрдэнэт үйлдвэр” ТӨҮГ-ийн Спорт цогцолбор, “Хангарьд” спорт клуб болон Орхон аймгийн шайбатай хоккейн холбоо.
Энэхүү тэмцээн нь ахмад тамирчдын туршлагаас суралцах, хоккейн спортыг орон нутагт сурталчлан таниулах, ойн баярыг спортын цогц арга хэмжээгээр тэмдэглэн өнгөрүүлэх зорилготой юм. Эрдэнэт хотын мөсөн талбайд өрнөх ширүүн өрсөлдөөн ирэх өдрүүдэд үргэлжлэх бөгөөд хоккейн сонирхогчид болон иргэдийг хүрэлцэн ирж, ахмад тамирчдаа дэмжихийг зохион байгуулагчид урилаа.
Эрдэнэт хотод ийм том тэмцээн болж байгаад баяртай байна
Манай тамирчид сайн тоглоно гэж найдаж байна