АНУ-д 2025 онд бүртгэгдсэн улаан бурхан өвчний тохиолдол сүүлийн 30 гаруй жилийн хугацаанд анх удаа 2 мянга давсан үзүүлэлттэй гарчээ. Өвчний хяналт, урьдчилан сэргийлэх төвийн мэдээллээс иш татан Axios порталын 12 дугаар сарын 31-нд мэдээлснээр, энэ онд өвчлөлийн тоо огцом нэмэгдэж, дэгдэлт удаан үргэлжилсэн нь 2026 оны нэгдүгээр сарын эцэс гэхэд АНУ-ыг олон улсад хүлээн зөвшөөрөгдсөн улаан бурхныг “устгасан” улс гэх статусаа алдахад хүргэж болзошгүй болоод байна.
2025 оны 12 дугаар сарын 23-ны байдлаар улсын хэмжээнд нийт 2012 тохиолдол бүртгэгдсэн бөгөөд халдвар авсан хүмүүсийн 93 орчим хувь нь вакцин хийлгээгүй эсвэл вакцины статус нь тодорхойгүй байжээ. Хамгийн их өвчлөл бүртгэгдсэн мужуудыг Техас (803), Аризона (187) болон Хойд Каролина (156) тэргүүлж байгаа бол харьцуулбал 2024 онд АНУ-д ердөө 285 тохиолдол батлагдаж байсан юм.
