Олон Улсын Жүдо Бөхийн Холбоо (IJF)-ны 2025 оны улирлын сүүлийн цуврал тэмцээн болох “Токиогийн Их Дуулга” энэ сарын 6-наас 7-ны өдрүүдэд Японы нийслэлд болно. Энэхүү тэмцээнд дэлхийн 43 орны нийт 324 (үүнд эрэгтэй 186, эмэгтэй 138) жүдоч өрсөлдөхөөр мэдүүлгээ өгсөн бөгөөд Монгол Улсаас нийт 16 тамирчин оролцож, эх орноо төлөөлөн барилдана.
🇲🇳 Монголын Үндэсний Шигшээ Багийн Бүрэлдэхүүн:
1. Эрэгтэй Тамирчид:
- 60 кг: Б.Сүхбат, К.Ёолк
- 66 кг: Б.Эрхэмбаяр
- 73 кг: Л.Анхзаяа, О.Уранбаяр
- 81 кг: Н.Жангарай
- 90 кг: Ц.Дагвадорж
- +100 кг: Б.Гончигсүрэн, О.Цэцэнцэнгэл
2. Эмэгтэй Тамирчид:
- 48 кг: Ж.Анударь
- 52 кг: М.Нандин-Эрдэнэ
- 57 кг: Л.Сосорбарам, Т.Ариунзаяа
- 63 кг: Гавьяат Тамирчин Л.Энхрийлэн, Х.Ариунтунгалаг
- 78 кг: О.Хүслэн
Токиогийн Татами дахь Монголын Түүх:
Токиогийн татамигаас хамгийн анх медаль хүртсэн Монгол жүдоч бол Ардын багш, Гавьяат Тамирчин Д.Баттулга бөгөөд тэрээр 1990 онд “Кано кап” тэмцээний 60 кг-ын жинд мөнгөн медаль хүртэж байсан. Харин отгон медалийг 2024 онд өсвөрийн дэлхийн аварга Т.Ариунзаяа хүрэл медаль хүртэн эх орондоо авчирсан юм.
Монголын жүдо бөхийн Үндэсний шигшээ багийн тамирчид 2025 онд Дэлхийн Аварга Шалгаруулах, Азийн Аварга Шалгаруулах, Их дуулга, Гранпри зэрэг олон улсын тэмцээнээс нийт 38 медаль (10 алт, 7 мөнгө, 21 хүрэл) хүртээд байгаа нь энэ оны амжилтыг харуулж байна.
