Япон Улсын нийслэл Токио хотноо сонсголын бэрхшээлтэй тамирчдын спортын хамгийн том наадам болох дифлимпын XXV их наадам энэ сарын 15-26-ны өдрүүдэд үргэлжилж байна. Энэ удаагийн наадамд 81 улсын 3200 гаруй тамирчин 21 спортын төрлөөр өрсөлдөж буй бол манай улсаас жүдо, чөлөөт бөх, ширээний теннис, хөнгөн атлетик, буудлага зэрэг таван төрөлд 14 тамирчин хүч үзэж байна.
Өнөөдөр чөлөөт бөхийн төрөлд зодоглосон Н.Эрхэмбаяр медалийн тавцанд гарч, “Токио-2025” дифлимпын наадмаас хүрэл медаль хүртлээ. Ийнхүү түүний авсан хүрэл медаль нь энэ удаагийн дифлимпээс Монголын багийн хүртэж буй анхны медаль болж түүхэнд үлдэж байна. Манай тамирчдын хувьд улирлын оргил тэмцээн дээр ийнхүү медалийн салхийг хагалсан нь бусад багийнханд ч урам зориг өгч байгаа юм.
Н.Эрхэмбаярын хувьд дифлимпын дэвжээнд олон жилийн турш тогтвортой амжилт үзүүлж яваа туршлагатай тамирчин. Тэр өмнө нь:
- 2017 оны дифлимпын наадмаас мөнгөн медаль,
- 2022 оны дифлимпын наадмаас алтын медаль
хүртэж байсан бол энэ удаагийн хүрлээрээ дифлимпын түүхэн дэх гурав дахь медалиа өөрийн болгоод байна. Ингэснээр тэр Монголын сонсголын бэрхшээлтэй чөлөөт бөхийн спортын нүүр царай, манлайлагчдын нэг гэдгээ дахин баталлаа.
Монголын баг тамирчид дифлимпын наадмаас өмнө нь нийтдээ хоёр алт, зургаан мөнгө, дөрвөн хүрэл медаль хүртэж байсан удаатай. Токио-2025 наадмын энэ хүрэл медалиар манай улсын медалийн тоо ахиж, сонсголын бэрхшээлтэй тамирчдаа системтэй бэлтгэж, дэмжихийн чухлыг харуулж байна. Цаашид жүдо, буудлага, ширээний теннис, хөнгөн атлетикийн төрөлд ч медалийн боломж байгааг багийн дасгалжуулагчид онцолж байгаа юм.
Гайхалтай амжилт байна! Монголын анхны медаль гэдэг үнэхээр бахархмаар
Ийм мэдээ сонсохоор үнэхээр сэтгэл сайхан болдог. Дараагийн тэмцээнүүдэд амжилт хүсье