Эзэн Богд Чингис хааны мэндэлсний 863 жилийн ой, “Монгол бахархлын өдөр”-ийг Өвлийн тэргүүн сарын шинийн гуравны энэ өдөр тохиолдуулан Богд хааны ордон музейн их танхимд баатарлаг тууль хайлах ёслол болов. Монголын эртний аман соёлын нэгэн оргил болсон туульсын урлагийг өнөө цагийн үзэгчдэд улам тод хүргэх зорилготой тус арга хэмжээнд “Хаан Чингэл баатар” баатарлаг туулийг өв уламжлалын дагуу хайлсан нь онцлог байлаа.
Нээлтийн үгийг Монгол Улсын Ерөнхийлөгчийн Соёл, шашны бодлогын зөвлөх Б.Сэргэлэн хэлж, баатарлаг тууль нь монголчуудын үзэл санаа, эв нэгдэл, эх оронч ухамсрыг тээж ирсэн түүхэн ач холбогдолтойг онцлов. Мөн өв соёлоо зөв таньж мэдэх, түгээн дэлгэрүүлэх үйл хэрэгт санаачилгатай оролцож буй байгууллага, судлаач, оюутан залууст талархал илэрхийлсэн юм.
Тууль, туульчдын тухай эрдэм шинжилгээний танилцуулгыг ШУА-ийн Хэл зохиолын хүрээлэнгийн ахлах судлаач, доктор Т.Баясгалан хийж, “Хаан Чингэл баатар” туулийн түүхэн тархалт, хувилбар, агуулгын онцлогийг тайлбарлав. Харин туулийн уран сайхны бүтэц, дүр дүрслэл, утга санааны талын тайлбарыг МУИС-ийн Утга зохиол, урлаг судлалын тэнхимийн багш, докторант И.Даваадорж хүргэж, оюутан, залуу судлаачдад чухал мэдээлэл өглөө.
Арга хэмжээний уран бүтээлийн хэсэгт:
- Монгол Улсын Консерваторын багш, морин хуурч, хөөмийч А.Маргад – “Чингис хааны магтаал”
- Соёлын гавьяат зүтгэлтэн, туульч А.Балдандорж, Э.Баатаржав – “Алтайн магтаал”, “Хаан Чингэл баатар” тууль
хайлж, хөгжим, дуу, магтаал, тууль хосолсон өвөрмөц уур амьсгал бүрдүүлэв.
“Хаан Чингэл баатар” тууль нь дайсандаа ганцаар бус, хамтын хүчээр ялалт байгуулж буй түүхийг өгүүлэхийн зэрэгцээ анд нөхрийн үнэнч холбоо, эв эе, нэгдлийн үнэ цэнийг илтгэн харуулдаг. Энэхүү тууль нь баяд, дөрвөд, урианхай туульчдын дамжуулж ирсэн аман өв бөгөөд олон зуун жилийн турш монголчуудын сэтгэлгээ, ёс суртахууны нэгэн хэмжүүр болж ирсэн гэж судлаачид үздэг.
Баатарлаг тууль хайлах энэ ёслолыг Богд хааны ордон музей, ШУА-ийн Хэл зохиолын хүрээлэн, МУИС-ийн Утга зохиол, урлаг судлалын тэнхим хамтран зохион байгуулав. Монгол Улсын Ерөнхийлөгчийн 2019 оны 13 дугаар зарлигаар баталсан “Монгол баатарлаг туульсаа дээдлэн дэлгэрүүлэх тухай” шийдвэрийн дагуу жил бүрийн Хаврын тэргүүн болон Өвлийн тэргүүн сарын шинийн гурванд баатарлаг тууль хайх уламжлал тогтоод байгаа нь энэ удаагийн ёслолоор дахин нэг батжиж байна.
