2025 оны 11 дүгээр сарын 19-ний өдөр нэмэгдсэн өртгийн албан татварын (НӨАТ) урамшууллын сугалааны ээлжит тохирлыг шинэчилсэн журмын дагуу зохион байгууллаа. Тохирлыг ebarimt гар утасны аппликэйшн болон “Боловсрол” суваг телевизээр нэгэн зэрэг шууд дамжуулж, улс даяар үзэгчид сугалааны явцыг бодит цаг хугацаанд нь үзэх боломжтой болсон байна.
Энэ удаагийн тохиролд 2025 оны 10 дугаар сарын 1-нээс 31-ний хооронд хийсэн худалдан авалтын баримтууд хамрагдав. Тодруулбал, 2025 оны 11 дүгээр сарын 18-ны өдрийн 12:59 цагаас өмнө цахим төлбөрийн системд бүртгэгдсэн 53 645 500 ширхэг баримтыг сугалаанд оруулжээ. Эдгээрээс доорх тооны баримт тохиролд таарч, азтанууд тодорсон байна.
- 8 орон таарсан: 1 баримт
- 7 орон таарсан: 0 баримт
- 6 орон таарсан: 45 баримт
- 5 орон таарсан: 492 баримт
- 4 орон таарсан: 4 831 баримт
- 3 орон таарсан: 48 052 баримт
Ингэснээр НӨАТ-ын урамшууллын систем нь хэрэглэгчдийг баримтаа бүртгүүлэхэд идэвхжүүлж, татварын ил тод байдлыг нэмэгдүүлэх зорилтоо үргэлжлүүлэн хэрэгжүүлж байгаа гэж Татварын ерөнхий газар мэдээлэв. Шинэчилсэн журмын дагуу сугалааны шагнал нь сугалааны ангилал, түвшнээс шалтгаалан үндсэн урамшууллын дүн дээрээ “байршлын нэмэгдэл” нэмж тооцогдож олгогдож байгаа юм.
Тодруулбал, "Сугалааны тохирлоор урамшуулал олгох, түүнийг явуулах журам"-ын 3.8-д заасны дагуу тухайн сугалааны урамшууллын зэрэг, ангилалд тохирсон үндсэн мөнгөн дүнг азтанд олгохдоо байршлын нэмэгдлийг нэмж тооцон шилжүүлдэг байна. Энэ нь нийслэл, орон нутгийн хэрэглэгчдийн хооронд тэнцвэртэй хөшүүрэг бий болгож, бүртгэлтэй баримтын тоо, идэвхийг нэмэгдүүлэх зорилготой зохицуулалт юм гэж дурджээ.
